އީ-ވިޒާއާއި އިމިގްރޭޝަންގެ ހިދުމަތްތައް ޑިޖިޓަލައިޒް ކުރުމުން މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީން އެކަމަށް މަރުހަބާ ކިޔައިފި އެެވެ.
އެ އެސޯސިއޭޝަނުން ނެރުނު ބަޔާނެއްގައި ބުނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހާއްސަ އިސްކަމެއް ދެއްވާ މޯލްޑިވްސް 2.0 ޤައުމީ ސިޔާސަތުގެ ދަށުން އިމިގްރޭޝަންގެ ހިދުމަތްތައް ޑިޖިޓަލައިޒް ކުރުމާއެކު އީ-ވިޒާގެ ހިދުމަތްތައް ތަޢާރަފުކުރުމާއި ބިދޭސީ މަސައްކަތްތެރީންގެ މައުލޫމާތު ދެނެގަނެވޭނެ އެޕްލިކޭޝަނެއް ލޯންޗް ކުރުމަކީ މި އިންޑަސްޓްރީގެ މަސައްކަތްތަކަށާއި ހިންގުމުގެ ދާއިރާ އާއި ކުންފުނިތަކުގައި މަސައްކަތް ކުރާ ބިދޭސީންގެ ކަންކަން ބެލެހެއްޓުމަށް ލިބުނު ބޮޑު ފަސޭހައެއް ކަމަށެވެ.
އެހެން ކަމުން މި ޚިދުމަތްތައް ތަޢާރަފު ކުރެއްވުން ފާހަގަކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އެ އެސޯސިއޭޝަންގެ މެންބަރުންނާއި ހިންގާ ކޮމެޓީގެ މެންބަރުންގެ ނަމުގައި ތަޙްނިޔާ ދަންނަވައި އިޚްލާސްތެރިކަމާއެކު ޝުކުރު ދަންނަވާ ކަމަށެވެ.
"އެއްވެސް ޝައްކެއް ނެތް ގޮތުގައި ބިދޭސީންގެ މައުލޫމާތު އެކުލެވޭ އަދި ފަސޭހައިން ކާކުކަން ދެނެގަނެވޭ އެޕްލިކޭޝަނާއި އީ-ވިޒާގެ ނިޒާމަކީ ދިވެހިރާއްޖެ ކަހަލަ ޖަޒީރާ ގާއިމަކަށް ނުހަނު ބޭނުންތެރރި އަދި ކޮންމެހެން ބޭނުންވެފައިވާ ޚިދުމަތްތަކެކެވެ,"
ބިދޭސީ މަސައްކަތްތެރީން ބެލެހެއްޓުމުގެ ކަންކަން ހަރުދަނާ ކުރުމަށް ސަރުކާރުން ކުރައްވާ މަސައްކަތްތަކުގައި ދާޚިލީ ސަލާމަތާއި ފަންނިއްޔަތާބެހޭ ވަޒީރު އަލީ އިޙްސާން ދެއްވާ ސަމާލުކަމާއި ކޮންޓްރޯކާ ޖެނެރަލް އޮފް އިމިގްރޭޝަން ކޮމިޝަނަރު އޮފް ޕޮލިސް ރިޓަޔާޑް އަހްމަދު ފަސީހް އާއި އިމިގްރޭޝަންގެ އޮފިސަރުން ކުރައްވާ މަަސައްކަތްތަކާއި ކަމާބެހޭ މުވައްޒިފުން ކުރައްވަމުން ގެންދަވާ ޚިދުމަތްތައް އެ އެސޯސިއޭޝަނުން ފާހަގަކުރަނީ މި މަސައްކަތުގައި ދިވެހި ކޮންސްޓްރަކްޝަން އިންޑަސްޓްރީގެ ފުރިހަމަ ބައިވެރިވުމާއި އެއްބާރުލުން ދިނުމުގެ ޔަޤީން ކަމާއެކު ކަމަށް ބުނެފައިވެ އެވެ.
އެ އެސޯސިއޭޝަނުން އުންމީދުކުރަނީ އިމިގްރޭޝަނުގެ މަސައްކަތްތައް ޑިޖިޓަލައިޒް ކުރުމާއެކު ކޮންސްޓްރަކްޝަން އިންޑަސްޓްރީއަށް ކުރިމަތިވެފައިވާ ބިދޭސީން ފިލުމާއި ޤާނޫނާއި ޤަވާއިދާ ޚިލާފަށް މަސައްކަތް ކުރުމުގެ މައްސަލައަށް އެކަށީގެންވާ ޙައްލެއް ލިބުމާއެކު ކޮންސްޓްރަކްޝަން މަސައްކަތްތައް ހިންގުން ފަސޭހަވެ މަސައްކަތަކަށް އޭގެ ހެޔޮ އަސަރުކުރާނެ ކަމުގަ އެވެ.
Advertisement
This content is created and paid for by advertisers and does not involve Voice Journalists
