ޗައިނާ ސަރުކާރުން ދިނުމަށް ނިންމާފައިވާ ސްކޮލަރޝިޕަށް ކުރިމަތިލުމުގެ ފުރުސަތު ދިވެހި ދަރިވަރުންނަށް ހުޅުވާލައިފިއެވެ. 

ޗައިނާ އެމްބަސީން ދިވެހި ދަރިވަރުންނަށް ސްކޮލަރޝިޕް ފުރުސަތު ހުޅުވާލާފައިވާއިރު، އެމްބަސީން ބުނީ އެޕްލިކޭޝަން ހުށަހެޅުމުގެ ސުންގަޑިއަކީ އަންނަ އަހަރުގެ ފެބުރުއަރީމަހުގެ 10 ވަނަ ދުވަސް ކަމަށެވެ.

އެމްބަސީގެ ވެބްސައިޓްގައި ކޮސްފައިވާ އިއުލާނުގައި ބުނެފައިވަނީ ހުރިހާ އެޕްލިކާޝަންއެއް ވެސް ބަލައިގަންނާނީ އޮންލައިންކޮށްކަމަށެވެ. އެގޮތުން އެޕްލިކޭޝަން ހުށަހަޅާ ފަރާތްތަކުން "ސްޓަޑީ އިން ޗައިނާ" ވެބްސައިޓަށް ޒިޔާރަތްކޮށް، "ސްކޮލަރޝިޕް އެޕްލިކޭޝަން ފޮރ ސްޓޫޑެންޓްސް" އަށް ވަދެ، އޮންލައިން އެޕްލިކޭޝަން ހުށަހެޅޭނެއެވެ. ފޯމް ހުށަހަޅާއިރު ސައްހަ ލިޔުންތައް ފޮނުވުމަށް އެމްބަސީންވަނީ އިލްތިމާސްކޮށްފައެވެ.

ކުރިއަށް އޮތް ދެ އަހަރަށް ޗައިނާގެ އަންޑަރގްރެޖުއޭޓް ޕްރޮގްރާމްތަކަށް ކުރިމަތިލާ ފަރާތްތަކުން އެޕްލިކޭޝަން ހުށަހެޅުމުގެ ކުރިން "ޗައިނާ ސްކޮލަސްޓިކް ކޮމްޕެޓެންސީ އެސެސްމަންޓް" (ސީއެސްސީއޭ) ހަދާ، އެ އެސެސްމެންޓުގެ ޞައްޙަ  ނަތީޖާ ރިޕޯޓެއް ހުށަހަޅަންޖެހެއެވެ.

އަންޑަރގްރެޖުއޭޓް ޕްރޮގްރާމްތަކަށް ވަނުމަށް ބޭނުންވާ ފަރާތްތަކުން މިއަހަރުގެ ޑިސެމްބަރުމަހުގެ 21 ނުވަތަ އަންނަ ޖެނުއަރީމަހުގެ 25 ވަނަ ދުވަހު ބާއްވާ ސީއެސްސީއޭ ޓެސްޓުތަކަށް ރަޖިސްޓަރީ ކުރަންޖެހެއެވެ. މިއީ ޔުނިވަރސިޓީ އެޑްމިޝަން ރިވިއުއަށް ކޮންމެހެން ބޭނުންވާ ލިޔުމެއްކަމަށް ޗައިނާ އެމްބަސީން ވަނީ ފާހަގަކޮށްފައެވެ. 

މިކަމާއި ގުޅޭ އިތުރު މައުލޫމާތުތައް www.csca.cn އަށް ވަނުމުން ނުވަތަ އެންބަސީ ނަންބަރު 4622 އަށް ގުޅައިގެން ސާފުކުރެވޭނޭކަމަށް އެމްބަސީން ބުނެއެވެ.