ދައުލަތުެގ ބައިތުލްމާލުން ފޯރާ ތަނަވަސްމީހުންނަށް ދެމުން އަންނަ އިނާޔަތްތައް ދިނުން ހުއްޓާލަންޖެހޭކަމަށް ރައްޔިތުންގެ މަޖިލީހުގެ އޭދަފުށީ ދާއިރާގެ މެންބަރު އަހްމަދު ސަލީމް ވިދާޅުވެއްޖެއެވެ.
މަޖިލީހުގެ ތަޅުމުގައި ކުރިއަށްދާ ބަޖެޓް ބަހުސްގައި ވާހަކަދައްކަވަމުން ސަލީމް ވިދާޅުވީ، މި ޤައުމު ހިންގޭވަރަށް ފައިސާ ލިބޭކަމަށާއި، ހުރިހާވެސް މައްސަލައަކީ ދައުލަތުގެ ބައިތުލްމާލުން އިނާޔަތް ދޭން ނުޖެހޭ މީހުންނަށް އިނާޔަތުގެ ގޮތުގައި އެކި އަދަދުތަކުން ފައިސާ ދޭ ދިނުންކަމަށެވެ.
ދައުލަތުގެ ބައިތުލްމާލުން އިނާޔަތާ މާލީ އެހީއަކީ ފުދުންްތެރިކަމެއްނެތް މީހުންނަށް ދޭންޖެހޭ އެއްޗެއްކަން ފާހަގަކުރައްވައި ސަލީމް ވިދާޅުވީ، ދުަވަސްވީ މީހުންނަށާއި، އެނޫންވެސް ކަންކަމުގައި ސަބްސިޑީގެ ގޮތުގައި ދެވޭ ފައިސާ މުއްސަނދި މަހުޖަނުންނަށް ދެވެމުންދާކަމަށެވެ. އެހެންނަމަވެސް މިހާތަނަށް ރާއްޖޭގައި ކަންކަން ހިނގަމުން އަންނަނީ އެމަގުން ނޫންކަން ސަލީމް ފާހަގަކުރެއްވިއެވެ.
ހަގީގަތުގައި މި އާސަންދައާ އެންސްޕާއަކީ ތަނަވަސް އަހުލުވެރިންނަށް ދޭންޖެހޭ އެއްޗެއް ނޫން. މިއީ ނިކަމެތި ރައްޔިތުންނަށް ދޭންޖެހޭ އެއްޗެއް. އަޅުގަނޑުމެން މި ރާއްޖޭގައި އެންސްޕާއާ އާސަންދައާ ލިބޭ ކިތަންމެ ތަނަވަސްމީހަކު އެބަހުރި. އަދި 65 އަހަރުވީމާ އެ ލިބޭ 5000 ރުފިޔާވެސް އެއީ މަހުޖަނަކަށްވިއަސް ކިތަންމެ ބޮޑު ވިޔަފާރިވެރިއަކަށްވިއަސް އެ ރުފިޔާވެސް އެބަނަގާ
ސަލީމް ވިދާޅުވިއެވެ
ސަލީމް ވިދާޅުވީ ހައްގު ނޫން މީހުނަށް ދައުލަތުެގ ބައިތުލްމާލުންދޭ ފައިސާ ދިނުން ހުއްޓުވަން ޖެހޭކަމަށާއި މިހާރު ފެނިގެންމިދަނީ މުއްސަނދިން އަތުން ނަގަންޖެހޭ ޒަކާތްް ހަމަ އެމީހުންނަށް ލިބިގެންދާ މަންޒަރުކަމަށެވެ. ސަލީމް ވިދާޅުވީ އިސްލާމްދީނުގައި ކަނޑައަޅާފައިވާ ގޮތަށް ޒަކާތް ނެގެމުންދާނަމަ ނިކަމެތި ރައްޔިތުންގެ މުހުތާދުތައް ފުއްދޭނޭކަމަށެވެ.
Advertisement
This content is created and paid for by advertisers and does not involve Voice Journalists
