ފުވައްމުލައްސިޓީ ފެނުގެ ނިޒާމަށް ކުރިމަތިވި މައްސަލައާ ގުޅިގެން އެރަށު ކައުންސިލުން ސަޕޯޓް ޑެސްކެއް މިއަދު ގާއިމްކޮށްފިއެވެ.

މިދިޔަ އާދިއްތަދުވަހު ފުވައްމުލައް ސިޓީ ފެނުގެ ނިޒާމު ތަގައްޔަރުވެ ފެނަކައިން ވަނީ ފެން ދޫކުރުން ވަގުތީގޮތުން މެދުކަނޑާލާފައެވެ.

މިކަމާ ގުޅިގެން ފުވައްމުލައް ސިޓީ ކައުންސިލުން މިއަދު ބުނީ ފެނުގެ މައްސަލައާ ގުޅިގެން ރައްޔިތުންނަށް ފަސޭހައަކަށް ސަޕޯޓް ޑެސްކެއް ގާއިމްކޮށްފައިވާކަމަށެވެ. އެގޮތުން ސާފްބޯފެން ލިބުމުގައި އެއްވެސްކަހަލަ މައްސަލައެއް އުޅޭނަމަ 6862875 ނުވަތަ 6862816 އަށް ނަމްބަރަށް ގުޅުމުން ކައުންސިލުން އެކަމެއް ހައްލުކޮށްދޭނޭކަމަށް ކައުންސިލުން ބުނެއެވެ.

ފުވައްމުލަކް ފެނުގެ މައްސަލަ ހައްލުކުރުމަށް ކުރަމުންގެންދާ މަސައްކަތްތަކާ ގުޅޭގޮތުން ދައުލަތުގެ މީޑިއާ ޕީއެސްއެމް ނިއުސްއާ ވާހަކަަދއްކަވަމުން ފެނަކައިގެ މެނޭޖިން ޑިރެކްޓަރ މުޙައްމަދު ނަޖާހު ވިދާޅުވެފައިވަނީ ފެން ތަގައްޔަރުވުމުގެ މައްސަލަ މިހާރު ހައްލުކޮށް ނިމިފައިވާކަމަށެވެ. މިހާރު ކުރިއަށްދަނީ ފެން ލީކްވުން ހުއްޓުވުމުގެ މައްސަލަކަމަށް އޭނާ ވިދާޅުވިއެވެ. މަސައްކަތް ކުރިއަށްދާގޮތުން މިއަދު އިރުއޮއްސުމާ ހަމަޔަށް ފެނުގެ ހިދުމަތް އަލުން ދޭން ފަށާނޭކަމަށް އޭނާ ވަނީ ވިދާޅުވެފައެވެ.

ފުވައްމުލައް ސިޓީއަށް ފެން ކެނޑުމުގެ މައްސަލަ ދިމާވުމާއެކު، ހަމަ އެދުވަހު ސަރުކާރުން ވަނީ ކަނޑާއި ވައިގެ މަގުން ބޯފެން ފޯރުކޮށްދިނުމާއި އަދި ބޭނުންވާ އެހެނިހެން އެހީތެރިކަން ފޯރުކޮށްދިނުމުގެ މަސައްކަތް ސިފައިން މެދުވެރިކޮށް ފަށާފައެވެ. އެގޮތުން އިއްޔެގެ ނިޔަލަށް 5 ލިޓަރުގެ 500 ކޭސް ފެނާއި، 1.5 ލިޓަރުގެ 1300 ކޭސް ފެނާއި، 500 މިލިލިޓަރުގެ 1000 ކޭސް ފެން ވައިގެ މަގުން ފުވައްމުލައް ސިޓީއަށް ގެންދިޔަކަމަށް ސަރުކާރުން ވަނީ ބުނެފައެވެ. އަދި މިފަހުން ވަނީ 1200 ކޭސް ފެން އެ ރަށަށް ގެންގޮސްފައެވެ.

ފުވައްމުލައް ސިޓީން ފެނުގެ ހިދުމަތް އިއްޔެ މެދުކަނޑާލަން ޖެހުނީ އެ ސިޓީގެ ފެނުގެ ނެޓްވޯކަށް ބައެއް ފަރާތްތަކުން ކްރޮސް ކަނެކްޝަން ހަދާފައިވުމުން، ސަޕްލައި ފެން ތަޣައްޔަރުވެ، ބޭނުން ކުރުން ރައްކާތެރި ނޫން ހާލަތްތަށް ދިޔުމުންނެވެ.

ފުވައްމުލައް ނަރުދަމާގެ މައްސަލަ މީގެ ކުރިން ބޮޑު މައްސަލައެއްގެ ގޮތުގައި އޮޑިޓަރ ޖެނެރަލް ވަނީ ފާހަގަކުރައްވާފައެވެ. މިކަން މިދިޔަ ސަރުކާރުގެ ދުވަސްވަރުން ފެށީގެން އޮތްއިރު އެކަމަށް މާބޮޑު އަޅާލުމެއް ދީފައިނުވާަކަމަށް ފުވައްމުލައްސިޓީގެ ބައެއް ރައްޔިތުން ފާހަގަކުރެއެވެ.