ކައުންސިލުތަކާއި ލާމަރުކަޒީ ނިޒާމަށް ގެންނަ ބަދަލުތައް ހާމަނުކުރާތީ އެމްޑީޕީން ކަންބޮޑުވެއްޖެ
ލޯކަލް ކައުންސިލްތަކުގެ ކުރިއަށް އޮތް އިންތިހާބާ ގުޅިގެން، ކައުންސިލުތަކާއި ލާމަރުކަޒީ ނިޒާމަށް ސަރުކާރުން ގެންނަން ރާވާ ބަދަލުތައް ހާމަނުކުރާތީ އިދިކޮޅު މައި ޕާޓީ، އެމްޑީޕީން ބޮޑު ކަންބޮޑުވުމެއް ފާޅުކޮށްފިއެވެ.
އެމްޑީޕީން މިއަދު ނެރުނު ބަޔާނެއްގައި ބުނެފައިވަނީ، އިންތިހާބު ބޭއްވުމަށް ވަގުތު ކުޑަތަންވަމުން އަންނައިރުވެސް، ބަދަލުތަކާ ގުޅޭގޮތުން ސިޔާސީ ޕާޓީތަކާ މަޝްވަރާކޮށްފައި ނުވާތީ، އިންތިހާބުގައި ވާދަކުރާ ފަރާތްތަކަށް ބޮޑެތި ދަތިތަކާ ކުރިމަތިވެފައިވާ ކަމަށެވެ.
އެމްޑީޕީން ބުނިގޮތުގައި، ލޯކަލް ކައުންސިލްތަކުގެ ކުރިއަށް އޮތް އިންތިހާބާ ގުޅޭގޮތުން މައުލޫމާތު ސާފުކުރުމަށާއި، މަޝްވަރާކުރުމަށް މި މަހުގެ 12 ވަނަ ދުވަހު އެ ޕާޓީން ވަނީ އިލެކްޝަންސް ކޮމިޝަނާ ބައްދަލުކޮށްފައެވެ. އެ ބައްދަލުވުމުގައި، ސަރުކާރުން ލާމަރުކަޒީ ނިޒާމަށް ގެންނަން ރާވާ ބަދަލުތަކަކީ ކޮބައިކަން އިލެކްޝަންސް ކޮމިޝަނަށް ވެސް އަންގައިފައިނުވާކަމަށް އެ ކޮމިޝަނުން ވަނީ ބުނެފައެވެ.
އަދި އެ ބަދަލުތައް ގެނައުމަށް ރައްޔިތުންގެ މަޖިލީހަށް ހުށަހަޅާ ބިލާމެދު އެ ކޮމިޝަނުގެ އެއްވެސް މަޝްވަރާއެއް ހޯދައިފައި ނުވާކަމަށްވެސް އެމްޑީޕީގެ ބަޔާނުގައިވެއެވެ.
ކައުންސިލުތައް އެކުލެވިގެންވާ ގޮތާއި، ކައުންސިލަރުންގެ އަދަދު މަދުކުރުމާއި އަދި އަތޮޅު ކައުންސިލްތައް އުވައިލުންފަދަ ބަދަލުތައް ލާމަރުކަޒީ ނިޒާމަށް ގެނައުމަށް ސަރުކާރުން ރައްޔިތުންގެ މަޖިލީހަށް ހުށަހެޅުމުގެ ވާހަކަ، ރައީސުލްޖުމްހޫރިއްޔާއާއި ސަރުކާރުގެ ވެރިން ދައްކަވަމުންދާއިރު، އެ ބަދަލުތައް ގެނައުމަށް ރައްޔިތުންގެ މަޖިލީހަށް މިހާތަނަށް ހުށަހަޅައިފައިނުވެއެވެ. މިކަމުގެ ސަބަބުން، ބަދަލުތަކެއް ގެންނާން އުޅޭކަން އެނގުނު ނަމަވެސް، އެއީ ކޮން ބަދަލުތަކެއްކަން މިހައިތަނަށް ސާފުވެފައިނުވެއެވެ.
އެމްޑީޕީން ފާހަގަކުރިގޮތުގައި، ސިޓީތަކުގައި އެކުލެވޭ ދާރިރާތައް ކަނޑައަޅައިފައި ނުވުމުގެ ސަބަބުން، އެ ތަންތަނުގައި ޕްރައިމަރީ ބާއްވާފަހުން އަންނަ ބަދަލާއެކު އަލުން ކެންޑިޑޭޓުން ކަނޑައަޅަންޖެހުން ނުވަތަ ޕްރައިމަރީ ބާއްވަންޖެހިދާނެ ހާލަތު ދިމާވުންފަދަ އެތަކެއް ގޮންޖެހުންތަކެއް އެ ޕާޓީއަށް ދަނީ ކުރިމަތިވަމުންނެވެ. އެމްޑީޕީން ދެކޭގޮތުގައި، މިއީ ރައްޔިތުންގެ މަޖިލީހުގައި އޮތް ސަރުކާރުގެ ފުރިހަމަ ބާރު ބޭނުންކޮށްގެން، އިންތިހާބަށް ސީދާ ނުފޫޒު ފޯރުވުމަށް ސަރުކާރުން ރާވައިފައިވާކަން ހާމަވާ ކަމެކެވެ.
މި ކަންބޮޑުވުންތައް ފާޅުކުރަމުން، އެމްޑީޕީން ވަނީ އިންތިހާބީ އުސޫލުތަކަށް ބަދަލު ގެންނަ ކަމުގައިވާނަމަ، އެކަން އިލެކްޝަންސް ކޮމިޝަނާއި ސިޔާސީ ޕާޓީތަކަށް ދުލާރައި އެންގުމާއެކު، ރައްޔިތުންނަށް އަވަހަށް ހާމަކުރުމަށް ސަރުކާރަށް ގޮވައިލާފައެވެ.
އެމްޑީޕީން މި ކަންބޮޑުވުން ފާޅުކުރިއިރު، ރައީސް ޑރ. މުޙައްމަދު މުޢިއްޒު ވަނީ އާބާދީއަށް ބަލައިގެން ރަށްތަކުގެ ކައުންސިލުތަކުގެ އަދަދުތައް ކަނޑައަޅުމަށް ޚިޔާލު ހުށަހަޅުއްވާފައެވެ. އެގޮތުން އާބާދީ މަދު ރަށްތަކުގައި ތިން ކައުންސިލަރުން ތިބުން ނުވަތަ ކައުންސިލުގެ ރައީސާއި ނައިބު ރައީސް ނޫން ހުރިހާ މެންބަރުންނަށް ސިޓިން އެލަވެންސްއެއް ދިނުމަށް ވެސް އެމަނިކުފާނު ވަނީ ހުށަހަޅުއްވާފައެވެ. ނަމަވެސް، އެކަމާ ގުޅިގެން މިހާތަނަށް ރަސްމީ މަސައްކަތެއް ސަރުކާރުން ކޮށްފައި ނުވާކަމަށް އިދިކޮޅުން ބުނެއެވެ.
Advertisement
This content is created and paid for by advertisers and does not involve Voice Journalists
