އިމިގްރޭޝަނުގެ ކަޅި އެންމެފަހުން ބިދޭސީން ވިޔަފާރި ހިންގާ ސަރަހައްދުތަކަށް
ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީން ހޯދުމަށް އިމިގްރޭޝަނުން ކުރިއަށްގެންދާ އޮޕަރޭޝަން ބިދޭސީން ވިޔަފާރި ހިންގާ ސަރަހައްދުތަކަށް އަމާޒުކޮށްފިއެވެ.
އިމިގްރޭޝަނުން މީގެ ކުރިން ބަލައިފާސްކުރުން ކުރިއަށްގެންގޮސްފައިވަނީ ހޮޓާހޮޓަލާއި، ބިދޭސީންގެ އެކޮމަޑޭޝަން ފަދަ ތަންތަނެވެ. ނަމަވެސް އިމިގްރޭޝަނުން މިފަހުން ވަނީ ބިދޭސީން ވިޔަފާރި ހިންގާކަމަށް ފާހަގަކުރެވޭ ސަރަހައްދުތައް ބަލައި ފާސްކުރަން ފަށާފައެވެ. އެގޮތުން އިއްޔެރޭ ކުރިއަށް ގެންގޮސްފައިވަނީ ގަލޮޅު ކަރަންކާ މަގާއި އެމަގާ ގުޅިފައިވާ ތަންތަން ރެއިޑްކުރުމުގެ އޮޕަރޭޝަނެވެ.
އިމިގްރޭޝަނުން ބުނީ ކަރަންކާމަގުގެ ސަރަހައްދު ބަލާ ފާސްކުރުމުގެ އޮޕަރޭޝަން ވަރަށް ކާމިޔާބުކަމަށެވެ. އެގޮތުން ޖުމްލަ 347 ބިދޭސީއަކު ޗެކްކޮށް، ގަވާއިދާ ޚިލާފަށް ތިބި 66 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންދެވުނުކަން ފާހަގަކުރިއެވެ.
މާލޭގެ އިތުރުން ހުޅުމާލޭގެ އެކި ސަރަހައްދުތަކުގައި ބިދޭސީން އިސްވެ ހިންގާ ވިޔަފާރިތައް އިތުރުވަމުން އަންނައިރު، މީގެ ތެރެއިން ބިދޭސީން އެންމެގިނައިން ހިންގާ ވިޔަފާރިތަކުގެ ތެރޭގައި ފާހަގަކުރެވެނީ ކަންމަތީ ކުދި ފިހާރަތައް ހިންގުމާއި މޯބައިލް ފޯނު މަރާމާތުކުރުމުގެ މަސައްކަތްކޮށްދޭ ތަންތަނެވެ. މިތަންތަނުން ހިދުމަތް ހޯދުމަށްފަހު ގިނަ ފަހަރަށް ފައިސާ ޖަމާކުރަން ބުނަނީވެސް ބޭރު މީހެއްގެ އެކައުންޓަށްކަން ބައެއް މީހުން ފާހަގަކުރެއެވެ.
މިދިޔަ އޮކްޓޯބަރުމަހުގެ ތެރޭގައި ފޮރިން އިންވެސްޓްމަންޓް ޤާނޫނަށް އަމަލުކުރަން ފަށާފައިވާއިރު، އެ ޤާނޫނު ބުނާގޮތުން ބިދޭސީންނަށް ވަނީ ބައެއް ކަހަލަ ވިޔަފާރިތައް ހިންގުން މަނާކޮށްފައެވެ. އޭގެ ތެރޭގައި ހޯލްސޭލް އަދި ރީޓެއިލް ވިޔަފާރި ފާހަގަކޮށްލެވެއެވެ. މާލޭގެ އެކި ސަރަހައްދުތަކުގައި ހުންނަ ހޯލްސޭލްކޮށް ތަރުކާރީ ވިއްކާ ގިނަ ތަންތަނަކީ ބިދޭސީން އިސްވެހިންގާ ވިޔަފާރިތަކެވެ. އެގޮތުން އެއްޗެހީގެ އަގުތައް ކަނޑައަޅައި އެ ވިއްކުމުގެ ކަންކަންވެސް ކުރަނީ އެމީހުންނެވެ.
Advertisement
This content is created and paid for by advertisers and does not involve Voice Journalists
