މި ވެރިކަމުގެ ނިމިގެންމިދާ ދެ އަހަރުގެ ތެރޭގައި އެއްވެސް މީހަކު ސިޔާސީ ގޮތުން ހައްޔަރުކުރިތަން ނުފެންނާނެ ކަމަށާއި، ސިޔާސީ ގޮތުން ބަދަލުހިފުން ދޫކޮށްގެން މެނުވީ ހަމަޖެހުން ނުލިބޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެންސީގެ ފޯރިގަދަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވީ އެންމެ މުހިންމު އެއް ވައުދަކީ ޤައުމުގައި ހަމަޖެހުން ޤާއިމްކުރުން ކަމަށާއި، އެ ހަމަޖެހުން ޤާއިމްކުރުމުގެ ތެރޭގައި ޚާރިޖީ ސިޔާސަތު ބައްޓަންކޮށް ދިފާއީ ސިޔާސަތު ވަރުގަދަކުރުމާއެކު، ޤައުމުގެ ތެރޭގައި ހުރިހާ މާނައެއްގައި ވެސް ހަމަޖެހުން ޤާއިމްކުރުން ހިމެނޭ ކަމަށެވެ.
އަދި ސިޔާސީ ވިސްނުމުގައި އެއްވެސް މީހަކު ހައްޔަރުކުރުމެއް މި ސަރުކާރުގައި ނޯންނާނެ ކަމަށާއި، އެގޮތުން ނިމިގެން މިދާ ދެ އަހަރުގެ ތެރޭގައި އެއްވެސް ދިވެހި ރައްޔިތަކު ސިޔާސީ ގޮތުން ހައްޔަރުކުރިތަން ފެނިފައިވޭތޯ އެމަނިކުފާނު ވަނީ ސުވާލު އުފައްދަވާފައެވެ.
ނުފެންނާނެ. އަދި ކުރިޔަށް އޮތް ތާނގައިވެސް ނުފެންނާނެ. އެއީ އަޅުގަނޑުމެން އެކަން ކުރާނެ ގޮތެއް ނޫން. ސިޔާސީ ވިސްނުމުގައި އަޅުގަނޑަކަށް އެއްވެސް ވަރަކަށް ކަންބޮޑުވުމެއް ނެތް ކިތަންމެ ވާހަކައެއް ބޭފުޅަކު ދެއްކިޔަސް، ބަޔަކު ދެއްކިޔަސް. ސިޔާސީ ވިސްނުމުގައި ކޮންމެ ކަމެއް ކުރިޔަސް. އެ މިނިވަންކަން މި ޤައުމުގައި އޮންނާނެ.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ، މީގެ ކުރީގެ ވެރިކަންތަކާއި ޚިލާފަށް މި ސަރުކާރުން ސިޔާސީ ގޮތުން ބަދަލު ހިފުމުގެ ރޫޙު ކުރިޔަށް ނުގެންދާނެ ކަމަށެވެ.
އަދި ޤައުމަށް ހަޤީގީ މާނައިގައި ހަމަޖެހުން އަންނާނީ ބަދަލު ހިފުމުގެ ނުބައި ވިހަ އޮއިވަރު ނައްތާލެވިގެން ކަމަށާއި، އެއަށް ވުރެ ބޮޑަށް ޤައުމު އިސްކޮށްގެން ކަމަށް ވެސް ރައީސް ވިދާޅުވިއެވެ.
މީގެ ކުރީގައި އެހެންނެއް ނޫން. އެއް އަހަރު ވާއިރުގައި އަމުދުން ދެ އަހަރު ވާއިރުގައި އެންމެން ތިބޭނީ ޖަލުގައި. އަޅުގަނޑުމެން އެހެންނެއް ނަހަދާނަން. ސިޔާސީ ގޮތުންނެއް ނޯންނާނެ ބަދަލު ހިފުމެއް. އަޅުގަނޑު ދެންނެވިން ބަދަލު ހިފުމުގެ ރޫހު މި ސަރުކާރުން ނުގެންދާނަމޭ ކުރިޔަކަށެއް. މިއަދާއި ހަމައަށް އައިއިރު ނޯންނާނެ ހަމަ އެއްވެސް ވަރަކަށް ބަދަލު ހިފުމުގެ ރޫޙޫ ތަންފީޒުކޮށްފައެއް. އެގޮތަށް ޢަމަލުކޮށްފައެއް. އެއީ އަޅުގަނޑު ބޭނުން ހަޤީގީ މާނައިގައި މި ޤައުމަށް ހަމަޖެހުން އަންނަން. ހަޤީގީ މާނައިގައި ހަމަޖެހުން އަންނާނީ އެ ބަދަލު ހިފުމުގެ ރޫޙު ނުބައި ވިހަ އޮއިވަރު މި ޤައުމުން ނައްތާލެވިގެން. އެއަށް ވުރެ ބޮޑަށް ޤައުމު އިސްކޮށްގެން.
ރައީސް ޑރ. މުޙައްމަދު މުޢިއްޒު
އެއާއެކު ރައީސް ވަނީ ޕީއެންސީގެ "ލަޝްކަރަކީ" ބަދަލު ހިފުމުގެ ރޫޙު ނުގެންގުޅޭނެ ލަޝްކަރު ކަމުގައި ފާހަގަކުރައްވާފައެވެ.
ރައީސް އެފަދައިން ވިދާޅުވިއިރު، މިދިޔަ ވެރިކަމުގައި އޭރުގެ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީންގެ މައްޗަށް އުފުލު ދައުވާތަކުގައި އެމަނިކުފާނު ޖަލަށްލައިފައިވަނީ ސިޔާސީ ގޮތުން ކަމަށް އޭރުގެ އިދިކޮޅު ފަރާތްތަކުން ދިޔައީ ބުނަމުންނެވެ. އަދި އެ ސިޔާސީ ބަންދުން އެމަނިކުފާނު ދޫކޮށްލުމަށް ގޮވާލާ ގިނަ ހަރަކާތްތަކެއް އޭރު އެ ފަރާތްތަކުން ވަނީ ހިންގާފައެވެ.
Advertisement
This content is created and paid for by advertisers and does not involve Voice Journalists
