ދައުލަތުގެ ބެލުމުގެ ދަށުގައި ތިބި 101 ކުއްޖަކު އާއިލާތަކާ ޙަވާލުކޮށްފައިވާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ "ރައްޔިތުންނާއިއެކު ކުރިއަށް" ނަމުގައި ސަރުކާރަށް 104 ހަފްތާ ފުރުން ފާހަގަކުރުމަށް މިރޭ ކުރިއަށްދާ ޖަލްސާގައި ވާހަކަދައްކަވަމުންނެވެ. މި ކުދިން އާއިލާތަކާއި ހަވާލުކޮށްފައިވަނީ "ކޮންމެ ކުއްޖަކަށް އާއިލާއެއް" ޕްރޮގްރާމްގެ ދަށުންނެވެ.
ރައީސް ވިދާޅުވީ، ކޮންމެ ކުއްޖަކަށް އާއިލާއެއް" ޕްރޮގްރާމަކީ، އާއިލާތަކުން އަޅާނުލާ ނުވަތަ އަޅާލާނެ ބަޔަކު ނެތި މަގުމަތިވެފައި ތިބޭ ކުދިންނަށް ޚާއްސަކޮށްގެން ކުރިއަށް ގެންދާ ޕްރޮގްރާމެއް ކަމަށެވެ. އެގޮތުން މި ޕްރޮގްރާމްގެ ތެރެއިން މިހާތަނަށް ދައުލަތުގެ ބެލުމުގެ ދަށުގައި ތިބި 101 ކުއްޖަކު އާއިލާތަކާ ޙަވާލުކުރެވިފައިވާކަން ފާހަގަކުރައްވާ ރައީސް ވަނީ، މިއީ ވަރަށް ކާމިޔާބުކަމާއެކު ކުރިއަށް ގެންދާ ޕްރޮގްރާމެއްކަން ފާހަގަކުރައްވާފަ އެވެ.
މި ސަރުކާރުން ބޭނުންވަނީ އޯގާތެރި، އަޅާލާ މުޖުތަމައެއް ބިނާކުރުމަށް ކަމަށް ރައީސް ވިދާޅުވިއެވެ. އަދި އެކަން ކުރުމަށްޓަކައި އެންމެންގެ ބައިވެރިވުން މުހިންމުކަން ވެސް ރައީސް ފާހަގަކުރެއްވިއެވެ.
" މި ސަރުކާރަކީ، އޯގާތެރި އަޅާލާ ސަރުކާރެއް. މި މުޖުތަމަޢު ހަދަން ބޭނުންވަނީވެސް އެގޮތަށް. އަޅުގަނޑުމެންގެ މުޖުތަމަޢުގެ ތެރޭގައި އެއްގޮތަކަށްވެސް އަޅުގަނޑުމެން ބޭނުމެއްނޫން އަޑުއިވޭކަށް ފެންނާކަށް އެއްވެސް މީހަކަށް އަޅުގަނޑުމެންގެ ތެރޭގައި ކުޑަކުދިންނަށް އަޅާނުލާ އެކުދިންނަށް އަނިޔާކޮށް، އެކުދިންނާ ދޭތެރޭގަ ބަހައްޓަންޖެހޭ އަޅާލުން ނުބަހައްޓާ ވާހަކަ. އެކަން ނައްތާލެވޭނީ އެންމެން ގުޅިގެން"
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ކޮންމެ ކުއްޖަކަށް އާއިލާއެއް ޕްރޮގްރާމަކީ، ދަޢުލަތުގެ ބެލުމުގެ ދަށުގައި ތިބި ކުދިންނަށް ދާއިމީ އާއިލާއެއް ހޯދަ ދޭން، އެ ކުދިންނަށް އާއިލީ ލޯބީގެ ތެރެއިން ބޮޑުވުމުގެ ފުރުޞަތު ދިނުމަށް ހިންގާ ހާއްސަ ޕްރޮގްރާމެެކެވެ.
Advertisement
This content is created and paid for by advertisers and does not involve Voice Journalists
