ޓެންޒޭނިއާގެ ރައީސް ސާމިއާ ސުލޫހޫ ހަސަން، އޭނާގެ އަންހެން ދަރިކަނބަލުން ވާނޫ ހާފިޟް އަމީރު، އަދި ދަނބިދަރިކަލުން މުޙައްމަދު މްޗެންގެރުވާ އަށް އެގައުމުގެ މިނިސްޓަރުންކަމުގެ މަގާމް ދެއްވައިފިއެވެ. 

އެގޮތުން އެކަމަނާގެ ދަރިކަނބަލުން ވާނޫ ހާފިޟް އަމީރު އައްޔަނު ކުރެއްވީ ތަޢުލީމާ ބެހޭ ނާއިބު ވަޒީރުގެ މަގާމަށެވެ. އުމުރުން 43 އަހަރުގެ ވާނޫ ހާފިޟް އަމީރަކީ، އަމިއްލަ-ދާޚިލީ ވެރިކަމެއް ހިންގާ ޒެންޒިބާރުގެ މަކުންޑޫޗީ ދާއިރާގެ މަޖިލިސް މެމްބަރެވެ. އޭނާ ވަނީ 2025 އޮކްޓޯބަރު 29 ވަނަ ދުވަހު ބޭއްވި ޢާންމު އިންތިޚާބުގައި، ވެރިކަން ކުރާ ޕާޓީ، ޗަމާ ޗާ މާޕިންޑޫޒީ (ސީސީއެމް) ގެ ޓިކެޓުގައި ވާދަކުރައްވައި، މަޖިލީހުގެ ގޮނޑި ދިފާޢުކުރައްވާފައެވެ. އޭނާގެ މަންމަ ރައީސް ސާމިއާ ސުލޫހޫ ހަސަން ވެސް ރިޔާސީ އިންތިޚާބަށް ކުރިމަތިލެއްވީ ހަމަ އެ ޕާޓީގެ ފަރާތުންނެވެ.

ހަމަ އެއާއެކު، ރައީސް ސާމިއާ ވަނީ ވާނޫގެ ފިރިކަލުން، މުޙައްމަދު މްޗެންގެރުވާ، ޞިއްޙަތާ ބެހޭ ވަޒީރުގެ މަގާމަށް އައްޔަން ކުރައްވާފައެވެ. އުމުރުން 46 އަހަރުގެ މްޗެންގެރުވާ އަކީ، އެ ޤައުމުގެ އިރުމަތީގައިވާ ޕްވާނީ ސަރަޙައްދުގެ ރުފީޖީ ދާއިރާގެ މަޖިލިސް މެމްބަރުވެސްމެއެވެ.

މީގެ އިތުރުން ޓެންޒޭނިއާގެ ކުރީގެ ރައީސް ޖަކާޔާ ކިކްވެޓޭގެ ދަރިކަލުން، ރިޟްވާން ކިކްވެޓޭ ވެސް ވަނީ ރައީސް ސާމިއާ ސުލޫހޫ ހަސަންގެ އޮފީހުގެ ވަޒީރެއްގެ މަގާމަށް އައްޔަން ކުރައްވާފައެވެ. އޭނާ ހުންނަވާނީ ރައީސުލްޖުމްހޫރިއްޔާގެ އޮފީހުގައި، ޕަބްލިކް ސަރވިސް މެނޭޖްމަންޓާއި ގުޑް ގަވަރނަންސްއާ ޙަވާލުވެވަޑައިގެންނެވެ.

އުމުރުން 46 އަހަރުގެ ރިޟްވާން ކިކްވެޓޭ އަކީ ވެސް ސީސީއެމް ޕާޓީގެ މެމްބަރެކެވެ. އޭނާ ތަމްސީލު ކުރައްވަނީ ޕްވާނީ ސަރަޙައްދުގެ އައްސޭރިފަށުގެ ދާއިރާއެއް ކަމަށްވާ ޗަލިންޒޭ ދާއިރާއެވެ.

ޓެންޒޭނިއާގައި އޮކްޓޯބަރު 29 ގައި ބޭއްވި ރިޔާސީ އިންތިޚާބު ގާތްގަނޑަކަށް 98 އިންސައްތަ ވޯޓުން ކާމިޔާބު ކުރެއްވި ރައީސް ސުލޫހޫ ހަސަން، އަލުން އެކުލަވާލެއްވި ވަޒީރުންގެ މަޖިލީހަށް 27 ވަޒީރުންނާއި 29 ނާއިބު ވަޒީރުން ވަނީ އައްޔަން ކުރައްވާފައެވެ.