ޤައުމީ ބޭންކް، ބޭންކް އޮފް މޯލްޑިވްސްގެ ބޭރުފައިސާގެ މުއާމަލާތްތަކުގެ ހާލަތު މިހާރު އޮތީ ވަރަށް ރަނަގޅު ފައްތަރެއްގައިކަމަށް އެ ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވެއްޖެއެވެ.

ވޭތުވެދިޔަ ދެ އަހަރެއްހާ ދުވަހުގެ ތެރޭގައި ބީއެމްއެލުން ހާސިލްކުރި ކާމިޔާބީގެ ވާހަކަތަކުގެ ވާހަކަތައް ދައުލަތުގެ މީޑިއާގައި ހިއްސާކުރަމުން ސީއީއޯ ޝަރީފް ވިދާޅުވީ ކޮވިޑާ ގުޅިގެން ބޭންކަށް ބޭރުފައިސާ ލިބުމުގައި ބޮޑެތި ގޮންޖެހުންތަކަކާ ކުރިމަތިލާން ޖެހުނު ކަމަށެވެ. އެގޮތުން ކުރިމަތިލާން ޖެހުނު ދަތި ހާލަތުން އަރައިގަތުމަށް ދިގު މުއްދަތެއް ނެގިކަން ފާހަގަކުރައްވަމުން ޝަރީފް ވިދާޅުވީ، ބޭރުފައިސާގެ ދަތިކަމަށް އޮތް ގޮްނޖެހުން ނައްތާލުމަށް ސަރުކާރުން ފެށި މަސައްކަތްތަކާއެކު އެދެވޭފަދަ ހެޔޮ ބަދަލުތަކެއް އަންނަމުންދާކަމަށެވެ.

ޝަރީފް ވިދާޅުވީ ކޯވިޑާއެކު ފޮރިން އެކްސްޗޭންޖް ޕޮޒިޝަން ދަށްވެގެންދޔަ ނަމަވެސް އަދުގެ ސަރުކާރުގެ އެހީޓެރިކަމާއެކު މިއަދު ދަތިތަކުން އަރައިގަނެ ބޭންކް އޮތީ ވަރަށް ރަނަގޅު ފައްތަރެއްގައިކަމަށެވެ.

ބޭރުފައިސާ ލިބުމުގައި އޮތް ދަތިކަމަށް ހައްލު ގެނައުމަށް ސަރުކާރުން ވަނީ ފޮރުން އެކްސްޗޭންޖް ޤާނޫނު ހަރުދަނާކޮށް އެ ޤާނޫނަށް އަމަލުކުރަން ފަށާފައެވެ. 

އެމްއެމްއޭއިން ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާ ގުޅިގެން ޓޫރިޒަމް ވިޔަފާރިކުރާ ކުންފުނިތަކުން މިހާރު، މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.

ބޭރުފައިސާ މާރުކުރުމުގެ އުސޫލަށް ގެނައި ބަދަލާއެކު ބޭންކްތަކަށް ބޭރުފައިސާ ލިބި، ކުރިން ހިފަހައްޓަމުންއައި ބޭރުފައިސާގެ މުއާމަލާތްތަކަށް ބީއެމްއެލުން ވަނީ ދޫދޭން ފަށާފައެވެ. އެގޮތުން ވިސާ ކާޑުތަކުންނާއި ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތްތައް ކުރެވޭ ލިމިޓް ވަނީ އިތުރުކޮށްފައެވެ.

އެގޮތުން ބީއެމްއެލުން ވަނީ އަންނަ އަހަރުގެ ފެބުރުއަރީމަހުން ފެށިގެން ބީއެމްއެލް ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް، ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް އިތުރު ކުރުމަށް ނިންމާފައެވެ. އަދި  ޕްލެޓިނަމް ކާޑުގެ ލިމިޓް 1500 ޑޮލަރުން 2000 ޑޮލަރަށް ބޮޑު ކުރުމަށްވެސް ވަނީ ނިންމާފައެވެ. މީގެ އިތުރުން ބޭސްފަރުވާއަށް ރާއްޖެއިން ބޭރަށްދާ މީހުންނަށް ދޫކުރާ ޑޮލަރުވެސް ވަނީ މިފަހުން އިތުރުކޮށްފައެވެ. އެގޮތުން މީއެމްއެލުން ވަނީ މިއަހަރުގެ އޮަގަސްޓުން ފެށިގެން ބޭރަށް ބޭސްފަރުވާއަށް ދަތުރުކުރާ ބަލިމީހުންނަށް 2،000 ޑޮލަރު ވިއްކަން ފަށާފައެވެ.