އެނދުމަތިކޮށްގެން ހޯދި ފަރުވާގެ ހަރަދުތަކަށް ޓްރީޓޮޕާއި އޭޑީކޭ ހޮސްޕިޓަލަށް އެކަނިވެސް ހުސްވި އޮކްޓޯބަރުމަހު 6.4 މިލިއަން ރުފިޔާ ހޭދަވެފައިވާކަމަށް އެންސްޕާއިން ބުނެފިއެވެ.

އެންސްޕާއިން އާއްމުކުރި ތަފާސްހިސާބުތަކަށް ބަލާއިރު، އެންމެބޮޑު އަދަދެއް ހޭދަކޮށްފައިވަނީ ޓްރީޓޮޕް ހޮސްޕިޓަލަށެވެ. އެއީ ވިހެއުމާ ގުޅިގެން އެނދުމަތި ކުރިފަރާތްތަކަށެވެ. މި ތަފާސްހިސާބަށް ބަލާއިރު އޮކްޓޯބަރުމަހު 335 ފަރާތަކުން ވަނީ އެނދުމަތިކޮށްގެން ފަރުވާހޯދާފައެވެ. އެންމެގިނަ މީހުން ޓްރީޓޮޕް ހޮސްޕިޓަލްގައި އެނދުމަތިކޮށްގެން ފަރުވާހޯދާފައިވާއިރު، އެފަރާތްތަކަށް ކުރި ހޭދައިގެ ޖުމްލަ އުޅެނީ 4 މިލިއަން ރުފިޔާގައެވެ.

- ވިހެއުމާގުޅޭ: 1،056،007.19 މިލިއަން ރުފިޔާ (78 ކޭސް)

- ކަށީގެ ބަލިތައް: 984،151.70 (53 ކޭސް)

- އަންހެނުންގެ ބަލިތައް: 387،107 (24 ކޭސް)

- ނޭވާލާ ނިޒާމުގެ ބަލިތައް: 365،204.10 (17 ކޭސް)

- ކަރުންމަތީގެ: 248،746 (28 ކޭސް)

- ކުޑަކަމުދާ ނިޒާމް/ކަށީގެ ބަލިތައް: 217،193 (15 ކޭސް)

- ގޭސްޓްރޯއިންޓެސްޓިނަލް: 206،900.89 (29 ކޭސް)

ހުސްވިމަހު އޭޑީކޭ ހޮސްޕިޓަލުގައި އެނދުމަތިކޮށްގެން ފަރުވާ ހޯދި ފަރާތްތަކަށް ކުރި ހޭދަ އުޅެނީ 2.3 މިލިއަން ރުފިޔާގައެވެ. 

- ވިހެއުމާގުޅޭ: 507،741.69 ރުފިޔާ (40 ކޭސް)

- މައިބަދަ/ނާރުގެ ބަލިތައް: 485،185.91 ރުފިޔާ (9 ކޭސް)

- ކަށީގެ ބަލިތައް: 352،489 ރުފިޔާ (19 ކޭސް)

 - ކުޑަކަމުދާ ނިޒާމް/ކިޑްނީގެ ބަލިތައް: 176،390.30 (16 ކޭސް)

- ކާޑިއޯވެސްކިއުލާ: 134،280 ރުފިޔާ (9 ކޭސް)

- ގޭސްޓްރޯއިންޓެސްޓިނަލް: 133،219 ރުފިޔާ (13 ކޭސް)

މިދިޔަ މަހު އެންސްޕާއިން ރާއްޖޭގެ ޕްރައިވެޓް ހޮސްޕިޓަލްތަކުން އެނދުމަތިކޮށްގެން ހޯދާފައިވާ ފަރުވާތަކަށް ބޭސްފަރުވާގެ އެހީގެ ގޮތުގައި ހަރަދުކޮށްފައިވަނީ ސެޕްޓެންބަރުމަހު ހަރަދުކުރި ވަރަށްވުރެ 2.1 މިލިއަން ރުފިއާ މަދު އަދަދެކެވެ. 

ދައުލަތުގެ ބައިތުލްމާލުން ބޭސްފަރުވާގެ ކަންކަމަށް ކޮންމެ މަހަކުވެސް އަމިއްލަ ހޮސްޕިޓަލްތަކަށް އެތައް މިލިއަން ރުފިޔާއެއް ހޭދަކުރެއެވެ. އެ ހަރަދުތައް ކުޑަކުރުމުގެ ގޮތުން ސަރުކާރުން ދަނީ އަތޮޅުތެރޭގެ ރަށްރަށުގެ ސިއްހީ ހިދުމަތްދޭ ތަންތަނުގެ ފެންވަރު ރަނގަޅުކޮށް، ސަރުކާރުގެ މައި ހޮސްޕިޓަލުންދޭ ހިދުމަތް އިތުރަށް ތަރައްޤީކުރުމަށް މަސައްކަތްތަކެއް ކުރަމުންނެވެ.