އަށާރަ އަހަރުގެ އަންހެންމީހާއަށް އަނިޔާކުރިކަމުގެ ތުހުމަތުގައި މީހެއްގެ ވަނަވަރު އާއްމުކޮށްފި
މާފަންނުގައި ހުރި ގެއެއްގެ ތެރޭގައި 18 އަހަރުގެ އަންހެނަކަށް ހުއްދަނޫން ގޮތުގައި ގަދަކަމުން އަނިޔާކުރިކަމަށް ތުހުމަތުވާ މީހާގެ ވަނަވަރު ފުލުހުން އާއްމުކޮށްފިއެވެ.
މިއީ މިދިޔަ އަންގާރަދުވަހު ފުލުހުންގެ ސަމާލުކަމަށް އައިސްފައިވާ މައްސަލައެކެވެ. އެ މައްސަލަ ފުލުހުންނަށް ރިޕޯޓްކޮށްފައިވަނީ އަންގާރަދުވަހުގެ އިރޮއޮއްސި 6:11 ހާއިރުއެވެ. އެ އަންހެންމީހާއަށް ޖިސްމާނީ އަނިޔާތައް ދިންނަމަވެސް އޭނާއަށް ލިބުނު އަނިޔާތަކުގެ ތަފްސީލެއް ފުލުހުން ނުބުނެއެވެ.
އަންހެނަކަށް އަނިޔާކުރި މި މައްސަލާގައި ފުލުހުން ވަނަވަރު އާއްމުކޮށްފައިވަނީ ހ.ފޯސީޒަން އުމުރުން 19 އަހަރުގެ އާހިލް މުނާޒުއެވެ. ފުލުހުން ބުނީ އޭނާ ހައްޔަރުކޮށްފައިވަނީ އަންގާރަ ދުވަހުގެ ރޭގެ ވަގުތެއްގައި ކަމަށެވެ. މުނާޒުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން އޭނާގެ ބަންދުގެ މުއްދަތަށް 15 ދުވަސް ޖަހާފައިވާކަމަށް ފުލުހުން ބުންޏެވެ.
މި މައްސަލަ ތަހްގީގް ކުރަމުންދާކަމަށް ފުލުހުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
