ފަލަސްތީނުގެ ޒުވާން ޤައުމީޓީމާ ރާއްޖޭގެ ޓީމް ކުޅުނު އެކުވެރިކަމުގެ ދެމެޗްގައި ވިއްކި ސްވެނިއާ ޓިކެޓްތަކުން ލިބުނު ފައިސާ ފަލަސްތީނުގެ ޤައުމީޓީމާ ހަވާލުކޮށްފިއެވެ.

މިކަމަށްޓަކައި ބޭއްވި ހަފްލާގައި އެފްއޭއެމުން ވަނީ ފަލަސްތީނު ޓީމަށް ފައިސާގެ އެހީ ދިންކަމުގެ ރަމްޒީ ލިޔުން ހަވާލުކޮށްފައެވެ. ސްވެނިއާ ޓިކެޓްތައް ވިއްކައިގެން 300،000 ރުފިޔާ ލިބުނުއިރު، އެފްއޭއެމުން ވަނީ އެ ފައިސާއަށްވާ 19,455.25 ޑޮލަރު ހަދިޔާކުރުމަށް ނިންމާފައެވެ. އެފްއޭއެމުން ވަނީ ފަލަސްތީނަށް އެހީވުމަށް ސްވެނިއާ ޓިކެޓްގަތް ހުރިހާ ރައްޔިތުންނަށް ޝުކުރު އަދާކޮށްފައެވެ.

އޭއެފްސީ އޭޝިއަން ކަޕުގެ ކޮލިފައިންގައި ވާދަކުރާ ފަލަސްތީނުގެ 17 އަހަރުން ދަށުގެ ޒުވާން ޤައުމީ ފުޓްބޯޅަ ޓީމު ރާއްޖެ އައިސްފައިވަނީ މިމަހުގެ 10 ވަނަ ދުވަހެވެ. ފަލަސްތީނު ޓީމް ރާއްޖެއަށް ކުރި ޒިޔާރަތުގައި ވަނީ ރާއްޖޭގެ ޓީމާއެކުު ދެ މެޗް ކުޅެފައެވެ.

ފަލަސްތީނުގެ ޓީމް ރާއްޖެކުރި އެ ޒިޔާރަތަކީ އޭޝިއަންކަޕް ކޮލިފައިންގައި އެޓީމް ކުޅެންޖެހޭ މެޗްގެ ކުރިން ތަމްރީނުތައް ހަދައި ރާއްޖޭގެ ޤައުމީޓީމާއެކު އެކުވެރިކަމުގެ މެޗްތަކެއް ކުޅުމަށް ކުރި ޒިޔާރަތެކެވެ.

އޭއެފްސީ ކަޕް ކޮލިފައިން މެޗްތައް އޮންނާނީ މިމަހުގެ 22 އިން 30 އަށް ތައިލޭންޑްގެ ޗޮންބުރީގައެވެ.