މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން ވިއެޓްނާމްގެ މެދުތެރޭ ސަރަޙައްދުތަކުގައި ފެންބޮޑުވުމާއި ގުޅިގެން ބިންގަނޑު ކެނޑައިގެން ދުއުމުގެ ހާދިސާތަކުގައި މަރުވި މީހުންގެ އަދަދު 55 ކަށް އަރައިފިއެވެ.

ވިއެޓްނާމްގެ ކާރިސާތަކާ ބެހޭ އިދާރާއިން ބުނީ، މަރުވި މީހުންގެ ތެރޭގައި ގިނައީ ދަކް ލަކް ޕުރޮވިންސުގެ ރަށްތަކުގައި ދިރިއުޅޭ ރައްޔިތުން ކަމުގައެވެ. މި ގޮތުން، އެ ސަރަހައްދުން 27 މީހުން މަރުވެފައިވާ ކަން ޔަގީން ކުރެވިފައިވާއިރު، ހައިން ހޮވާ ޕުރޮވިންސުން އިތުރު 14 މީހުން މަރުވެފައިވާ ކަމަށް ވަނީ ރިޕޯޓް ލިބިފައެވެ.

ވިއެޓްނާމްގެ ސަރުކާރުން ބުނީ ފެންބޮޑުވުމާ ގުޅިގެން ލިބުނު ގެއްލުމުގެ އަގު 341 މިލިޔަން އެމެރިކާ ޑޮލަރަށް އަރާނެ ކަމަށް އަންދާޒާ ކުރެވޭ ކަމުގައެވެ. އަދި ފެންބޮޑުވުމާއި ގުޅިގެން ގެއްލުން ލިބިފައިވާ ގޭގެ އަދަދު 235,000 އަށް އަރާނޭކަމަށެވެ. މި ހާދިސާގައި ، 80 ހެކްޓަރުގެ ދަނޑުބިން ވަނީ ހަލާކުވެފައެވެ.

ބިންގަނޑު ކެނޑުމުގެ ހާދިސާތައް ކުރިމަތިވެފައި ވަނީ ފަތުރުވެރިންގެ މެދުގައި މަޤުބޫލު ސަރަޙައްދުތަކެއްގައެވެ. އެގޮތުން އެކަމުގެ އެންމެ ބޮޑަށް ކޮށްފައި ވަނީ ދަކް ލަކް ޕުރޮވިންސާއި ހައިން ހޮވާ ޕުރޮވިންސުގެ ސަރަޙައްދުތަކަށެވެ. އެ ތަނަކީ ދަނޑުތަކާއި މޫދަށް އެރޭ ސަރަޙައްދުތައް ގިނަ ހިސާބެކެވެ. އަދި އެއީ މޫސުން ގޯސްވެ، ތޫފާންތައް ޢާންމު ހިސާބެއްވެސްމެއެވެ. އެ ސަރަޙައްދުތަކުގައި ކަރަންޓުގެ ޚިދުމަތް މެދުކެނޑި އެކަމުގެ އަސަރު 300,000 މީހުނަށް ވަނީ ކޮށްފައެވެ.

ވިއެޓްމާންގެ މޫސުމާ ބެހޭ އިދާރާއިން ބުނީ، ފާއިތުވި ދެ ހަފުތާއެއްހާ ދުވަހުގެ ތެރޭގައި އެ ޤައުމުގެ މެދުތެރޭ ސަރަޙައްދުތަކަށް 1,900 މިލިމީޓަރުގެ ވާރޭ ވެހިފައިވާ ކަމުގައެވެ. މި އަހަރުގެ ޖަނަވަރީ މަހުން ފެށިގެން އޮކްޓޫބަރު މަހާ ދެމެދު ވިއެޓްނާމަށް ކުރިމަތިވި ޤުދުރަތީ ކާރިސާތަކުގައި މަރުވި މީހުންގެ އަދަދު މިހާރު ވަނީ 279 އަށް އުފުލިފައެވެ. އަދި، ލިބިފައިވާ ގެއްލުމުގެ އަގު 2 ބިލިޔަން އެމެރިކާ ޑޮލަރަށް އަރާ ކަމުގައި އެ ޤައުމުގެ ތަފާސްހިސާބުތައް ބަލަހައްޓާ އިދާރާއިން ވަނީ ހާމަކޮށްފައެވެ.

އެ އިދާރާއިން ބުނީ، މޫސުން ގޯސްވުމާ ގުޅިގެން ހިނގި މި ހާދިސާތަކުގައި ގެއްލިފައިވާ ކަމަށް ބެލެވޭ އިތުރު 13 މީހަކު ހޯދުމުގެ މަސައްކަތް އަދިވެސް ކުރަމުންދާ ކަމުގައެވެ. ގެދޮރުގައި ތާށިވެފައިވާ މީހުން ސަލާމަތް ކުރުމަށް ވެސް ވިއެޓްނާމްގެ އިދާރާތަކުން މިހާރު ދަނީ މަސައްކަތް ކުރަމުންނެވެ.