އޭއެފްސީ އޭޝިއަންކަޕް 17 އަހަރުން ދަށުގެ ކޮލިފައިންގައި މިއަދު ދިވެހިރާއްޖެއާ މޮންގޯލިއާ ބައްދަލުކުރިމެޗް ހަނިގޮތަކަށް މޮންގޯލިއާ ކާމިޔާބުކޮށްފިއެވެ.

ތައިލެންޑްގެ ޗޮންބްރީގައި ކުޅުނު މިމެޗް، މޮންގޯލިއާއިން ކާމިޔާބުކުރީ 0-1 ގެ ނަތީޖާއަކުންނެވެ. މެޗްގައި މޮންގޯލިއާ ޓީމުން އުފައްދަން އުޅުނު ގިނަ ހަމަލާތައް ރާއްޖޭގެ ކުޅުންތެރިން ވަނީ ހުއްޓުވާފައެވެ. މިމެޗްގައި ތަރިއަކަށްވީ ރާއްޖޭގެ ޓީމްގެ ކީޕަރު މުހައްމަދު މާއިލް މޫސާއެވެ. މިފަހަރުގެ ސްކޮޑްގައި ހިމެނުނު ޒުވާން ގިނަ ކުޅުންތެރިންނަނީ މިފަދަ ބައިނަލްއަޤްވާމީ ވާދަވެރި މެޗަކަށް އަލަށް ނިކުތް ކުޅުންތެރިންނެވެ. ނަމަވެސް މި މެޗްގައި މި ކުޅުންތެރިންވަނީ ވަރަށް ރަނގަޅަށް ކުޅެފައެވެ.

މެޗްގައި މޮންގޯލިއާއަށް ލީޑް ލިބުނީ ފުރަތަމަ ހާފްގެ ތެރޭގައެވެ. އެއީ ހިލޭޖެހުމަކުން ފޮނުވާލިބޯޅައެއް ރާއްޖޭގެ ކުޅުންތެރިއެއްގެ ގައިގައި ޖެހިފައި ގޯލްގެ ތެރެއަށް ވަތް ބޯޅައަކުންނެވެ.

ރާއްޖެއާ މޮންގޯޅިއާ ބައްދަލުކުރިމެޗްގެ ތެރެއިން... ފޮޓޯ: އޭއެފްސީ

މެޗްގައި މޮންގޯލިއާ ޓީމަށް ލީޑް ފުޅާކުރާނެ ރަނގަޅު ފުރުސަތުތައް ފުރަތަމަ ހާފްގެ އިތުރުވަގުތުގެ ކުޅުމުގެ ތެރޭގައި ވަނީ ލިބިގެންގޮސްފައެވެ. ނަމަވެސް ރާއްޖޭގެ ޓީމްގެ ކީޕަރު މުހައްމަދު މާއިލް ވަނީ ގިނަ ހަމަލާތައް ހުއްޓުވާފައެވެ. ރާއްޖެ ހިމެނޭ ކޮލިފައިން ގްރޫއްޕުގެ ދެވަނަ މެޗްގައި ބައްދަލުކުރީ ތުރުކެމިނިސްތާނާ ކުވައިތެވެ. މިމެޗް 0-1 ގެ ނަތީޖާއަކުން ކާމިޔާބުކުރީ ކުވެއިތެވެ. 

މުބާރާތުގެ ކޮލިފައިންގައި ދެން ރާއްޖެ ނިކުންނާނީ 24 ވަނަ ދުވަހު ތުރުކެމިނިސްތާނާ ދެކޮޅަށެވެ. އޭގެ ފަހުން ދެން ނިކުންނާނީ 26 ވަނަ ދުވަހު ތައިލެންޑާ ދެކޮޅަށެވެ. މިއީ ކޮލިފައިންގައި ރާއްޖެއަށް އެންމެ އުނދަގޫވާނޭކަމަށް ބެލެވޭ މެޗެވެ. 17 އަހަރުން ދަށުގެ އޭޝިއަން ކަޕް ކޮލިފައިންގައި ވާދަކުރާ ރާއްޖޭގެ ޓީމުގެ ކޯޗަކީ ޞަބާޙު މުހައްމަދު (ސޮބާ) އެވެ. 

ކޮލިފައިން މެޗްތަކަށް ނިކުތުމުގެ ކުރިން ރާއްޖޭގެ ޓީމް ދިޔައީ މާލޭގައި ފަލަސްތީނު ޓީމާ ދެކޮޅަށް ޕްރެކްޓިސް ދެ މެޗް ކުޅުމަށްފަހުގައެވެ.