ސްޕެއިންގެ ގަދަބާރު ބާސެލޯނާއިން އެނބުރި ކޭމްޕްނޫ އަށް އައި މެޗުން ބޮޑު މޮޅެއް ހޯދައިފިއެވެ.

2023 ވަނަ އަހަރުގެ ޖޫން މަހު ބާސާގެ ރަސްމީ ފުޓްބޯޅަ ދަނޑު، ކޭމްޕްނޫ ބަންދުކުރީ ދަނޑު ބޮޑުކުރުމުގެ މަސައްކަތްތަކަށާއި މާރާމަތުގެ މަސައްކަތްތަކަށެވެ. އެ ދަނޑު ބަންދުކުރުމާއި އެކު ފާއިތުވެދިޔަ ދެ އަހަރު ބާސާއިން ކުޅެމުން އައީ ސްޕެއިންގެ މޮންޖުކިޗް އޮލިމްޕިކް ސްޓޭޑިއަމްގައެވެ.

އެ ދަނޑުގެ މާރާމާތުގެ ބައެއް މަސައްކަތްތަކަށް ފަހު 45،000 މީހުންގެ ކުރިމަތީގައި ރޭ ބާސެލޯނާއިން ނުކުތީ ވާދަވެރި އެތްލެޓިކޯ ބިލްބާއޯއާއި ދެކޮޅަށެވެ. އެ މެޗު ބާސާއިން ކާމިޔާބު ކުރީ 0-4 އިންނެވެ.

ބާސާއިން ލަނޑުޖެހުމަށްފަހު އުފާފާޅުކުރަނީ -- ފޮޓޯ: އަލްޖަޒީރާ

ފުރަތަމަ ލަނޑު ޖެހީ މެޗު ފެށިގެން ފަސްވަނަ މިނެޓުގައި ބާސާގެ ތަޖުރިބާކާރު ފޯވާޑް، ރޮބާޓް ލެވަންޑޮސްކީއެވެ. މިއީ ބާސާއަށް ލެވަންޑޯސްކީ ބަދަލުވިފަހުން އޭނާ އެ ދަނޑުގައި ކާމިޔާބުކުރި ފުރަތަމަ ލަނޑެވެ.

މެޗުގައި މޮޅަށް ކުޅެ ބޯޅަ ހިފަހައްޓައިގެން ކުޅުނު ބާސާގެ އަނެއް ތިން ލަނޑު ޖެހީ ފާމިން ލޮޕޭޒް އަދި ފެރާން ޓޮރޭޒްއެވެ. އޭގެ ތެރެއިން ފެރާން ޓޮރޭޒް ވަނީ ދެ ލަނޑު ޖަހައިފައެވެ. އެ ދެ ލަނޑު ވެސް އެސިސްޓްކޮށްދިނީ ހުނަރުވެރި ޒުވާން ކުޅުންތެރިޔާ ލަމީން ޔަމާލްއެވެ.

ބާސާގެ މެއިން ސްޕޮންސާ، ސްޕޮޓިފައިގެ ނަން އިތުުރުކޮށް، "ސްޕޮޓިފައި ކޭމްޕްނޫ" އިއްޔެ ހުޅުވުމާއި ގުޅިގެން އެ ދަނޑުކައިރީގައި ވަނީ ހަވާވެސް އަރުވާފައެވެ. މުޅި ދަނޑު އެއްކޮށް މަރާމާތު ކުރުމުގެ މަސައްކަތް މި އަންނަ އަހަރު ނިންމަން ތާވަލުކޮށްފައިވާއިރު، އެ ދަނޑު ނިމުމުން އެއްފަހަރާ 105،000 މީހުންނަށް ކުޅިބަލަން ވަދެވޭނެއެވެ.

ދަނޑުގެ މައިގަނޑު މަސައްކަތްތައް ނިމި އެއްކޮށް ބޭނުންކުރަން ފެށުމުން އެ ދަނޑު ވާނީ ދުނިޔޭގެ އެންމެ ބޮޑު އެއް ދަނޑަށެވެ.