މިއަހަރުގެ މަސްވެރިންގެ ދުވަސް ފާހަގަކުރުމުގެ ގޮތުން ދުވާފަރަށް 50 ހަށްވުރެ ގިނަ ލޯންޗުދަތުރު ބޭއްވުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ނިންމައިފިއެވެ.
ކުރިއަށްއޮތް މަސްވެރިންގެ ދުވަސް ޤައުމީ ފެންވަރުގައި ފާހަގަކުރުމަށް ނިންމާފައިވަނީ ރ.އަތޮޅު ދުވާފަރުގައެވެ. ދުވާފަރަކީ ކުރިން ރ.އަތޮޅު ކަނދޮޅުދޫއިން މީހުން ބަދަލުކުރި ރަށެވެ. ކަނދޮޅުދޫއިން މީހުން ބަދަލުކުރީ 2004 ވަނަ އަހަރު ކުރިމަތިވި ސުނާމީ ކާރިސާއަށްފަހުއެވެ. ކަނދޮޅުދުއަކީ މަސްވެރި ރަށެކެވެ.
ދުވާފަރުގައި މަސްވެރިންގެ ދުވަސް ކުލަގަދަގޮތެއްގައި ފާހަގަކުރުމަށް ސަރުކާރުން ތައްޔާރީތައް ވަމުންދާއިރު، މަސްވެރިކަމާ ބެހޭ ވުޒާރާއިން ވަނީ މިނިސްޓްރީގެ ބޭނުމަށް އެރަށަށް ލޯންޗްދަތުރުތައް ކޮށްދޭނޭ ފަރާތެއް ހޯދުމަށް އިއުލާނުކޮށްފައެވެ. ލޯންޗްދަތުރުތައް ކުރުމަށް ތާވަލްކޮށްފައިވަނީ ޑިސެމްބަރުމަހުގެ 9 ވަނަ ދުވަހުން ފެށިގެން 15 ވަނަ ދުވަހުގެ ނިޔަލަށް މަސްވެރިކަމުގެ ދުވަހުގެ ހަރަކާތްތަކުގައި ބައިވެރިވާ ބޭފުޅުންގެ ދަތުރުފަތުރުގެ ބޭނުމަށެވެ. އެދުވަހު ރ.އަތޮޅުގެ އެކި ރަށްތަކުން ދުވާފަރަށް ލޯންޗް ދަތުރުތައް ބޭއްވުމަށް ވަނީ ނިންމާފައެވެ.
މަސްވެރިކަމާ ބެހޭ ވުޒާރާއިން ވަނީ އެކަމަށް ޝައުގުވެރިވާ ކުންފުނިތަކުން އަންނަ ޑިސެމްބަރުމަހުގެ ދެވަނަ ދުވަހުގެ 11 ގެ ކުރިން އެކަން ހުށަހެޅުމަށް އެދިފައެވެ.
ސަރުކާރުން އެންމެ ފުރަތަމަ މަސްވެރިންގެ ދުވަހެއް ރަސްމީކޮށް ފާހަގަކުރީ 1980 ވަނަ އަހަރު ރައީސް މައުމޫނުގެ ވެރިކަމުގައެވެ.
Advertisement
This content is created and paid for by advertisers and does not involve Voice Journalists
