އެމްޑީޕީގެ ޗެއާޕާސަންގެ މަގާމުން މިރޭ އިސްތިއުފާ ދެއްވި ފައްޔާޒް އިސްމާއީލަށް ކުރީގެ ރައީސް މުހައްމަދު ނަޝީދު ވަރަށް ބޮޑަށް ތައުރީފު ކުރައްވާ ޕޯސްޓެއް ކުރައްވައިފި އެވެ.

ނަޝީދުގެ ޕޯސްޓްގައި ވިދާޅުވީ އެމްޑީޕީ އުފެދުނީއްސުރެ ޕާޓީއަށް ފައްޔާޒް އިސްމާއީލް ނުހަނު ގިނަގުނަ ހިދުމަތް ކޮށްދެއްވާފައިވާ ކަމަށެވެ. އަދި ވިދާޅުވީ ޕާޓީގެ މަސައްކަތުގައި ފަހަތަށް ޖެހިވަޑައިނުގެން ޖަލަށް ވަޑައިގަންނަވަން ޖެހިވަޑައިގެންނެވި ވަގުތު އެކަން ވެސް ކުރެއްވި ކަމަށެވެ.

އެމަނިިކުފާނު ވަނީ އެމްޑީޕީއާއެކު ފައްޔާޒަށް އިތުރު ކާމިޔާބީއަށް އެދިވަޑައިގެންފަ އެވެ.

މަގާމުން އިސްތިއުފާ ދެއްވާކަން ފައްޔާޒު އިއުލާނު ކުރެއްވީ އެމްޑީޕީގެ ގައުމީ މަޖިލީހުގެ ޖަލްސާގަ އެވެ. އަދި އިސްތިއުފާގެ ސިޓީ ވަނީ ހުށައަޅުއްވާފަ އެެވެ. އެ ސިޓީގައި ވަނީ ޕާޓީގެ ލީޑަރުންނާމެދު ބަސްބުނުމުގެ ފުރުސަތު ހުޅުވާލާނޭ ކަމުގެ ވައުދުވެވަޑައިގެންފައިވާކަން ފާހަގަ ކުރައްވާ އެކަމަށް ފުރުސަތު ދެއްވުމުގެ ގޮތުން އިސްތިއުފާ ދެއްވާ ކަމަށެވެ.

އަދި ވިދާޅުވީ އެމްޑީޕީގައި މިހާރު ވެސް އިސްކޮށް ހަރަކާތްތެރިވާ އެޑްވައިޒަރާއި، ޕާޓީގެ ރައީސްއަށް ފުރިހަމަ އިހުތިޔާރާއި ބާރާއެކު ޕާޓީގެ ކަންކަން ނިންމައި، ކަންކަން ކުރިއަށް ގެންދިއުމަށް އޭނާއަކީ ހުރަހެއް ކަމަށް ދެކޭ ދެކުން ނިމުމަކަށް ގެންނަވާ ކަމަށެވެ.

"އެ މަގާމުގައި [އެމްޑީޕީގެ ޗެއާޕާސަންގެ މަގާމުގައި] އަޅުގަނޑު ހުރި މުއްދަތުގައި ޕާޓީގެ ހަރަކާތްތަކަށް އެކި ގޮތްގޮތުން އެހީތެރިވެދެއްވި ހިތްވަރުގަދަ އާންމު މެންބަރުންނާއި ޕާޓީގެ ކަންކަމުގައި ބުރަކޮށް މަސައްކަތް ކުރައްވަމުން ގެންދަވާ ގައުމީ މަޖިލީހާއި ސެކްރެޓޭރިއޭޓުގެ މެންބަރުންނަށް އިހުލާސްތެރިކަމާއެކު ޝުކުރު ދަންނަވަމެވެ,"

ފައްޔާޒު ވިދާޅުވީ އަސާސީ ހައްގުތަކާއި ރައްޔިތުންގެ ބާރުވެރިކަން ހޯދައިދިން ޕާޓީގެ މެންބަރުންނާއެކު ގާތުން މަސައްކަތް ކުރެވުމަކީ ހަޔާތުގައި ލިބުނު އެންމެ ބޮޑު އެއް ޝަރަފު ކަމަށެވެ. އަދި ވިދާޅުވީ ކުރިއަށް އޮތް ދުވަސްތަކުގައި ވެސް މި ޕާޓީގެ ގައުމީ މަޖިލީހާއި އާންމު މެންބަރެއްގެ ގޮތުގައި ވެސް އިސްލާހީ މަސައްކަތުގައި ދެމިހުންނާނެ ކަމަށެވެ.

އިސްތިއުފާގެ ސިޓީގައި ފައްޔާޒް ވަނީ މިދިޔަ މުއްދަތުގައި ޕާޓީގެ އެއްބައިވަންތަކަމާއި ބަދަހިކަމަށްޓަކައި ކުރެއްވި މަސައްކަތްތަކާއި ނަތީޖާއާމެދު ވެސް އެކި ވާހަކަތައް ހިއްސާކުރައްވާފަ އެވެ.