ދައުލަތުގެ ޕޭ ފްރޭމްވޯކަށް ގެނައި ބަދަލާއެކު، ބައެއް މުވައްޒަފުންގެ މުސާރަ ކުޑަވެފައިވާ ކަމަށްބުނެ، އެކަމާ ނުރުހުން ފާޅުކޮށް ހިމޭން އިހުތިޖާޖެއް ކުރުމަށް ޝަރުއީ ދާއިރާގައި މަސައްކަތްކުރާ މުވައްޒަފުން ކަޅު ހެދުމުގައި އޮފީހަށް ހާޒިރުވެއްޖެއެވެ.
އެގޮތުން، މާލޭގެ ހައި ކޯޓާއި ޑްރަގު ކޯޓާއި ސިވިލް ކޯޓާއި ފެމިލީ ކޯޓުގެ އިތުރުން ޖުވެނައިލް ކޯޓުގައި މަސައްކަތްކުރާ މުވައްޒަފުން ވެސް މިއަދު އޮފީހަށް ނުކުތީ ކަޅު ހެދުމުގައެވެ.
އަދި ށ. މިލަންދޫ މެޖިސްޓްރޭޓް ކޯޓާއި ށ. ފުނަދޫ މެޖިސްޓްރޭޓް ކޯޓާއި، ބ. ކިހާދޫ މެޖިސްޓްރޭޓް ކޯޓާއި ދ. ކުޑަހުވަދޫ މެޖިސްޓްރޭޓް ކޯޓުގެ މުވައްޒަފުން ވެސް ހިމެނޭހެން ބައެއް ރަށްރަށުގެ މެޖިސްޓްރޭޓް ކޯޓުތަކުގެ މުވައްޒަފުން ވެސް މި އިހުތިޖާޖުގައި ބައިވެރިވެފައިވާ ކަމަށް މައުލޫމާތު ލިބެއެވެ.
މުސާރައާއި ގުޅިގެން ހުރި ކަންބޮޑުވުންތައް ހައްލުކޮށްދިނުން އެދި ޖުޑިޝަރީ ދާއިރާގައި މަސައްކަތްކުރާ މުވައްޒަފުން ރައީސް އޮފީހަށް މިއަދު ޕެޓިޝަނެއް ވެސް ހުށަހަޅަން ތައްޔާރުވަމުން އަންނަ ކަމަށް މައުލޫމާތު ލިބެއެވެ.
ޖުޑިޝަރީ ދާއިރާގައި މަސައްކަތް ކުރާ މުވައްޒަފުން މައުލޫމާތު ދޭ ގޮތުގައި، މުސާރައިގެ ކަންބޮޑުވުން އޮތީ ލީގަލް ބައިގައި މަސައްކަތް ކުރާ މުވައްޒަފުންގެ އެވެ.
ޖުޑިޝަރީ ދާއިރާގެ ބައެއް މުވައްޒަފުންގެ މުސާރަ ކުޑަވެފައިވާ ކަމަށް ބުނެ އިހުތިހާޖު ކުރާއިރު، ޕޭ ކޮމިޝަނުން ބުނާގޮތުން، މުސާރަ ކުޑައެއް ނުވާނެއެވެ. އަދި އެ ދާއިރާގެ މުވައްޒަފުންނަށް "ޖުޑިޝަރީ ކޮންޓިނިއުޓީ އެލަވަންސް" ގެ ނަމުގައި އިތުރު އެލަވަންސްއެއް ވެސް ހަމަޖައްސާފައިވާ ކަމަށް އެ ކޮމިޝަނުން ފާހަގަކޮށްފައިވެއެވެ.
އެކި ދާއިރާތަކުގެ މުވައްޒަފުންގެ މުސާރައަށް ގެނެވުނު ބަދަލާއެކު، ފުލް މުސާރަ އަންނަ މަހުން ފެށިގެން ދޭން ފަށާއިރު، އެއްވެސް މުވައްޒަފެއްގެ އަސާސީ މުސާރަ 7،400ރ. އަށް ވުރެ ދަށް ނުވާނެ ކަމަށް ސަރުކާރުން ބުނެއެވެ.
Advertisement
This content is created and paid for by advertisers and does not involve Voice Journalists
