ޕާކިސްތާނުގެ އަސްކަރިއްޔާއިން އަފްޣާނިސްތާނަށް ދިންް ހަމަލާއެއްގައި މުޅި ޖުމުލަ 10 މީހުން މަރުވެއްޖެއެވެ. 

ޕާކިސްތާނުން މިއަދު މި ހަމަލާ ދީފައިވަނީ އަފްޣާނިސްތާނުގެ ޚޫސްތު ޕްރޮވިންސަށެވެ. މި ހަމަލާގައި މަރުވި 10 މީހުންގެ ތެރޭގައި ހިމެނެނި އަންހެނަކާއި 9 ކުޑަކުދިންނެވެ. އެއީ 4 އަންހެން ކުދިންނައި 5 ފިރިހެން ކުދިންނެވެ. 

އަފްޣާނިސްތާނުގެ ޠާލިބާން ސަރުކާރުގެ ތަރުޖަމާނު، ޒަހީބުالله މުޖާހިދު ވިދާޅުވީ ޕާކިސްތާނުގެ ޙަމަލާ އަމާޒުކޮށްފައި ވަނީ ވިލާޔަތު ޚާން ކިޔާ ޢާންމުންގެ މީހެއްގެ ގެއަށް ކަމަށެވެ. އަދި އެ ގެ އެއްކޮށް ސުންނާފަތިވެފައިވާ ކަމަށް ވެސް އޭނާ ވިދާޅުވިއެވެ.

މީގެ އިތުރުން އެ ޤައުމުގެ ކުނާރާއި ޕަކްތިކާ ޕްރޮވިންސުގައި ވެސް ޕާކިސްތާނުން ރޭޑު ޖަހާފައިވާ ކަމަށާއި، އެ ހާދިޘާތަކުގައި ވެސް ޢާންމުންގެ ހަތަރު މީހުންނަށް ޒަޚަމްވެފައިވާ ކަމަށް މުޖާހިދު ވިދާޅުވިއެވެ.

ޕާކިސްތާނުން މި ފަދަ ރޭޑެއް ކުރިއަށް ގެންގޮސްފައި މި ވަނީ ޕާކިސްތާނުގެ ޕެޝާވަރުގައި މަދަނީ ސިފައިންގެ މައި މަރުކަޒު ކައިރީގައި ދިން ބޮމުގެ ދެ ޙަމަލާއެއްްގައި ތިން ސިފައިން މަރުވިތާ އެއް ދުވަސް ފަހުންނެވެ.

ޕާކިސްތާނާއި އަފްޣާނިސްތާނުގެ އަސްކަރިއްޔާއާ ދެމެދު މިދިޔަ އޮކްޓޯބަރު މަހު ވަނީ ގިނަ ޙަމަލާތަކެއް ބަދަލުކޮށްފައެވެ. އަދި އެ ޙަމަލާތަކުގައި ގިނަ ޢަދަދެއްގެ މީހުން މަރުވެފައިވެއެވެ. މިއީ 2021 ވަނަ އަހަރުގެ ތެރޭގައި ޠާލިބާނުން އަފްޣާނިސްތާނުގެ ހިންގުމާ ޙަވާލުވި ފަހުން ހިންގާފައިވާ އެންމެ ވަރުގަދަ ލޭއޮހޮރުވުންތަކެވެ. މި ޙަމަލާ ބަދަލުކުރުން ނިމުމަކަށް އައީ ޤަޠަރުގެ ދައުޙާގައި ހަމަ އެ މަހުގެ ތެރޭގައި ސޮއިކުރި ޙަމަލާ ބަދަލުކުރުން ހުއްޓައިލުމުގެ އެއްބަސްވުމަކާއި ގުޅިގެންނެވެ. ނަމަވެސް އަފްޣާނިސްތާނުގައި ތިބެ ޙަރަކާތްތެރިވާ ޕާކިސްތާނާ ދެކޮޅު ހަތިޔާރު އެޅި ޖަމާޢަތްތަކުގެ މައްސަލައިގައި، އެ އެއްބަސްވުމަށް ފަހު ތުރުކީވިލާތުގައި ކުރިއަށް ގެންދިޔަ ޞުލްޙައިގެ މަޝްވަރާތައް ވަނީ ދާއިމީ އެއްބަސްވުމަކާ ހަމައަށް ނާދެވި ނިމުމަކަށް އައިސްފައެވެ. 

ޕާކިސްތާނުން ތުހުމަތުކުރާ ގޮތުގައި އަފްޣާނިސްތާންގައި ވެރިކަން ކުރާ ޠާލިބާން ސަރުކާރުން ދަނީ ނިރުބަވެރި ޖަމާޢަތްތަކަށް އެހީތެރިވެ، ޕާކިސްތާނަށް ޙަމަލާދިނުމަށް ހިތްވަރުދެމުންނެވެ. ނަމަވެސް އަފްޣާނިސްތާންގެ ޠާލިބާނުން ދަނީ އެ ތުހުމަތުތައް ތަކުރާރުކޮށް ދޮގުކުރަމުންނެވެ.  

މި ހަމަލާތަކާއި ހެދި އެ ދެގައުމުގެ ބޯޑަރުގައި މުދާ ތާށިވެ، 150-200 އެމެރިކާ ޑޮލަރު ދުވާލެއްގެ މައްޗަށް ދައްކަންޖެހިފައިވެއެވެ.