އަންނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ފުރަތަމަ މެޗަށް ކްރިސްޓިއާނޯ ރޮނާލްޑޯ ސަސްޕެންޑް ނުކުރާން ފީފާއިން ނިންމައިފިއެވެ.

ވޯލްޑް ކަޕް ކޮލިފައިންގައި ޕޯޗުގަލް އިން އަޔަލެންޑާ ދެކޮޅަށް ކުޅުނު މެޗުގައި ރޮނާލްޑޯއަށް ދެއްކި ރަތް ކާޑުގެ ސަބަބުން ވޯލްޑް ކަޕަށް އޭނާއަށް ސަސްފެންޝަންއެއް އައިސްދާނެކަމަށް ވަނީ ބެލެވިފައެވެ. އަޔަލެންޑް އަތުން 2-0 އިން ޕޯޗުގަލް ބަލިވިމި މެޗުގެ 61 ވަނަ މިނިޓްގައި ރޮނާލްޑޯއަށް ރަތް ކާޑެއް ދައްކާފައިވަނީ އަޔަލެންޑުގެ ޑަރަ އޯޝެއާ އަށް ފައުލުކުރުމުންނެވެ. މިއީ ރޮނާލްޑޯ ޕޯޗުގަލް އަށް ކުޅުނު 226 މެޗުގެ ތެރެއިން ސިދާ ރަތް ކާޑެއް ދެއްކި ފުރަތަމަ މެޗެވެ. 

އެގޮތުން މި ރަތާއި ހެދި ތިން މެޗުގެ ސަސްޕެންޝަނެއް އަތުވެދާނެ ކަމަށް ބެލެވުނެވެ. މިހާލަތުގައި އެގޮތަށް އެކަން ނިމިއްޖެނަަމަ ވޯލްޑް ކަޕްގައި ޕޯޗުގަލް އިން ކުޅޭ ފުރަތަަމަ ދެ މެޗު ރޮނާލްޑޯއަކަށް ނުކުޅެވޭނެއެވެ. 

ނަމަވެސް ފީފާ އިން އިއްޔެ ނިންމީ ރޮނާލްޑޯގެ އެ ރަތް ކާޑަށް ހަމައެކަނި އެއް މެޗަށް އޭނާ ސަސްޕެންޑްކުރުމަށެވެ. އެގޮތުން ނޮވެންބަރު މަހުގެ 16 ވަނަދުވަހު އަރްމީނިއާ އަތުން 9-1 އިން ޕޯޗުގަލް މޮޅުވެ ވޯލްޑް ކަޕްގެ ޖާގައެއް ހޯދި މެޗުގައި ރޮނާލްޑޯ ހުރީ ސަސްޕެންޝަނުގައެވެ. 

ފީފާ އިން ނިންމި މި ނިންމުމާއެކު އަންނަ އަހަރު އެމެރިކާ އާއި މެކްސިކޯ އަދި ކެނެޑާގައި ބާއްވާ ވޯލްޑް ކަޕްގައި ރޮނާލްޑޯއަށް ކުޅެވޭނެކަން މިވަނީ ޔަގީން ވެފައެވެ. އެހެންކަމުން މިއީ މެންޗެސްޓާ ޔުނައިޓެޑް އާއި ރިއާލްމެޑްރީޑަށް ކުރިން މޮޅު ކުޅުމެއް ކުޅެދީފައިވާ، އުމުރުން 40 އަހަރުގެ ރޮނާލްޑޯ ކުޅޭނެ ހަވަނަ އަދި އެންމެ ފަހު ވޯލްޑް ކަޕުވެސް މެއެވެ.