އިއްޔެ ރޯވެ އަދިވެސް ހުއްޓުމެއް ނެތި ހޮންކޮންގައި އަނދަމުންދާ އަލިފާންގަނޑުގައި މަރުވި މީހުންގެ އަދަދު 55 އަށް އަރައިފިއެވެ. 

ހޮންކޮންގެ ޓައި ޕޯ ޑިސްޓްރިކްޓްގައި ހުންނަ ވަންގް ފުކް ކޯޓް ރެޒިޑެންޝަލް ކޮމްޕްލެކްސްގައި އިއްޔެ އެގައުމުގެ ގަޑިން މެންދުރު 2:15 ގައި ފެށުނު އަލިފާންގަނޑު އަދިވެސް ދަނީ ރޯވެ އަނދަމުންނެވެ. މި ހާދިސާގައި ޖުމުލަ 55 މީހަކު މަރުވެ 70 މީހަކަށް އަނިޔާވެ ފަރުވާދެމުންދާ ކަމަށް ރިޕޯޓުކޮށްފައިވެއެވެ. މީގެ ތެރެއިން ބައެއް މީހުންގެ ހާލު ސީރިއަސްކަމަށް ރިޕޯޓްތައް ބުނެއެވެ. އަދި މަރުވި މީހުންގެ ތެރޭގައި ހިމެނެނީ ހާލުދެރަވެގެން ހޮސްޕިޓަލުގައި ފަރުވާ ދެމުންދަނިކޮށް މަރުވި 4 މީހުންނާ އަނދަމުންދާ ސަރަހައްދުގައި މަރުވި 51 މީހުންނެވެ. މި ހާދިސާގައި މަރުވި މީހުންގެ ތެރޭގައި އަލިފާންގަނޑު ނިންމުމުގެ މަސައްކަތުގައި އުޅުނު ފަޔަރފައިޓަރެއް ހިމެނެއެވެ. މީގެ އިތުރު ފަޔާފައިޓަރަކަށް ވަރަށްބޮޑަށް އަނިޔާވެ ހޮސްޕިޓަލުގައި އެޑްމިޓްކޮށްގެން ދަނީ ފަރުވާދެމުންނެވެ.

މި ހާދިސާގައި އިއްޔެ މަރުވިކަމަށް ރިޕޯޓުކޮށްފައިވަނީ 4 މީހުންނެވެ. އަދި ފިހިގެން 9 މީހަކު ހޮސްޕިޓަލް ގައި އިއްޔެ އެޑްމިޓްކޮށްފައިވާކަމަށް ރިޕޯޓުކޮށްފައިވެއެވެ. 

މި އަލިފާންގަނޑު ފެށިފައިވަނީ ޓައި ޕޯގެ 8 އުސް އިމާރާތުގެ ތެރެއިން 32 ބުރީގެ އިމާރާތެއްގައެވެ. ޖުމުލަ 2000 އެޕާޓްމެންޓް ހުންނަ މި ޑީސްޓްރިކްޓަކީ ގާތަގަނޑަކަށް 4800 މީހުން ދިރިއުޅެމުން އަންނަ ތެނެކެވެ. މިތަނުން އިމާރާތެއްގެ 32 ވަނަ ބުރީގައި ރޯވެ އަލިފާންގަނޑު ވަނީ ވުޑަ ވަގުތުކޮޅެއްގެ ތެރޭގައި ވަޔާއިއެކު ވަރަށް ބޮޑަށް ފެތުރިފައެވެ. އެހެނަކަމުން މި ސަރަހައްދުގައި ގެދޮރުވެރިވެގެން އުޅޭ މީހުންގެ ތެރެއިން 900 މީހުންނަށް ޗައިނާ ސަރުކާރުން ވަނީ ވަގުތީ ބޯހިޔާވަހިކަން ފޯރުކޮށްދީފައެވެ. 

މި ހާދިސާއާއި ގުޅިގެން މީހުން ސަލާމަތަކުރުމުގެ މަސައްކަތް އަދިވެސް މެދުކެނޑުމެއްނެތި އެ ގައުމުގެ ސަލާމަތީ ބާރުތަކުން ދަނީ ކުރަމުންނެވެ. އެގޮތުން މިހާތަނަށް ގެއްލިގެން 279 މީހުން ރިޕޯޓުކޮށްފައިވާ ކަމަށް އެގައުމު ނޫސްތަކުން މައުލޫމާތުލިބެއެވެ. މީގެ ތެރޭގައި އުމުރުން ދުވަސްވީ މީހުންނާއި ތުއްތު ކުދިން ވެސް ހިމެނެއެވެ.

މި ހާދިސާ ކުރިމަތުވާން މެދުވެރިވި ސީދާ ސަބަބެއް އަދިވެސް ދަނީ ތަހުގީގު ކުރެވެމުންނެވެ. ނަމަވެސް މިކަމާއި ގުޅިގެން އެ އިމާރާތަތރައް މަރާމާތު ކުރުމަށް ހަވާލުކޮށްފައިވާ ކޮންސްޓްރަކްޝަން ކޮންޕެނީ އިން ގަސްތުގައި މީހުން މެރިކަމުގެ ތުހުމަތުގައި ތިން ފިރިހެނުން ވަނީ ހައްޔަރުކޮށްފައެވެ. އެއީ ކޮންސްޓްރަކްޝަން ކުންފުންޏެއްގެ އިންޖިނިއަރިން ކޮންސަލްޓަންޓަކާއި 2 ޑިރެކްޓަރުންނެވެ. 

މިއީ ތާރީހުގައިވެސް ހޮންކޮންގައި ހިނގާދިޔަ އެންމެ ބޮޑު އަލިފާނުގެ ހާދިސާއެވެ. މީގެ ކުރިން ހިނގާފައިވާ އެންމެ ބޮޑު އަލިފާނުގެ ހާދިސާ އެ ސިޓީގައި ހިނގާފައިވާނީ 1996 ގައެވެ. 20 ގަޑި އިރަށް ރޯވެ އަނދަމުންދިޔަ މި އަލިފާންގަނޑުގައި ޖުމުލަ 41 މީހަކު ވަނީ މަރުވެފައެވެ.