ރާއްޖޭގެ އަތޮޅުތައް ހައި ސްޕީޑް ފެރީ ވިއުގާއަކުން ގުޅާލުމަށް ކުރިއަށްގެންދާ "އިންޓަރގްރޭޓެޑް ނެޝެނަލް ޕަބްލިކް ފެރީ ނެޓްވޯރކް" މަޝްރޫއުގެ ދަށުން، ނ. އަތޮޅާއި ރ. އަތޮޅާ ދެމެދު އާރްޓީއެލް ފެރީގެ ޚިދުމަތް އަންނަ އާދީއްތަ ދުވަހުން ފަށަން ތައްޔާރުވެއްޖެއެވެ.
މިއީ ރާއްޖޭގެ އަތޮޅުތައް ގުޅުވައިލުމަށް ފަށާފައިވާ މުހިންމު މަޝްރޫއެއްގެ ދެވަނަ ފިޔަވަހީގެ ޒޯން ދޭއްގެ ތެރެއިން ފެށޭ ޚިދުމަތެކެވެ.
އެމްޓީސީސީން ހިންގާ މި ޚިދުމަތް ފެށުމާއެކު، ނ. އަތޮޅާއި ރ. އަތޮޅު އާރްޓީއެލްގެ ވިއުގަ އިން ގުޅާލުމަށް ކަނޑައަޅާފައިވަނީ ނ. މަނަދޫ އާއި ރ. އުނގޫފާރުއެވެ. މި ޚިދުމަތް ދިނުމަށް ބޭނުންކުރާނީ 32 ފަސިންޖަރުންގެ ޖާގައިގެ ފެރީއެކެވެ. މީގެ އިތުރުން، އެންސްޕާގައި ރަޖިސްޓަރު ކުރެވިފައިވާ ހާއްސަ އެހީއަށް ބޭނުންވާ ފަރާތްތަކަށް ދަތުރުކުރުމަށް ދެ ސީޓު ވަނީ ހަމަޖައްސާފައެވެ.
ފެރީގެ މި ޚިދުމަތް ފެށުމާއެކު، މި ދެ އަތޮޅުގެ ރައްޔިތުންނަށް އިގްތިސާދީ ގޮތުންނާއި އިޖުތިމާއީ ގޮތުން ގިނަ ފައިދާތަކެއް ލިބިގެންދާނެ ކަމަށް އެމްޓީސީސީން ވަނީ ބުނެފައެވެ. މި ޚިދުމަތަކީ ރަސްމީކޮށް އަގު ނަގައިގެން ދެމުން އަންނަ ޚިދުމަތެއް ނަމަވެސް، އެންސްޕާގައި ރަޖިސްޓަރވެފައިވާ ހާއްސަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެ ކަމަށް ވެސް އެމްޓީސީސީން ވަނީ ބުނެފައެވެ.
ފެރީގެ ޓިކެޓު ނެގުމުގެ ޚިދުމަތް އާރްޓީއެލްގެ ވެބްސައިޓުންނާއި މޮބައިލް އެޕް މެދުވެރިކޮށް ފަސޭހަކަމާއެކު ލިބޭނެއެވެ. އަދި ކިއުއާރް ކޯޑު މެދުވެރިކޮށް ވެސް ޓިކެޓް ގަނެވޭނެ އިންތިޒާމު ވަނީ ހަމަޖައްސާފައެވެ.
ނ. އަތޮޅާއި ރ. އަތޮޅުގައި ފެރީގެ ޚިދުމަތް ފެށުމާއެކު، ރާއްޖޭގެ ޖުމްލަ 12 އަތޮޅަކަށް އާރްޓީއެލްގެ ފެރީގެ ޚިދުމަތް ފުޅާކުރެވުނީއެވެ.
Advertisement
This content is created and paid for by advertisers and does not involve Voice Journalists
