ރ.މީދޫ ކައުންސިލް ފުޓްސަލް ފިއެސްޓާ 2025 ގެ ޗެމްޕިއަންކަން ހަވާސް ސްޕޯޓް ކުލަބު ހޯދައިފިއެވެ.

މި މުބާރާތުގެ ޗެމްޕިއަންކަން ހަވާސް ހޯދާފައިވަނީ ބުދަދުވަހުގެ ރޭ ކުޅުނު ފައިނަލް މެޗްގައި ޒެފްރޯސް އެފްސީއާ ދެކޮޅަށް ކުޅުނުމެޗް ކާމިޔާބުކޮށްގެންނެވެ. މެޗްގެ ފުރިހަމަ ވަގުތު ހަމަވިއިރު ދެޓީމް އެއްވަރުވުމުން މެޗްގެ ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. ޕެނަލްޓީ ޝޫޓްއައުޓުން ހަވާސް ޗެމްޕިއަންކަން ހޯދީ 6-7 ގެ ނަތީޖާއަކުން މޮޅުވެގެންނެވެ.

މިފަހަރުގެ މުބާރާތުގެ ޗެމްޕިއަންކަން ހަވާސްއިން ހޯދުމާއެކު އެޓީމް ވަނީ މިހާތަނަށް 3 ފަހަރަށް މުބާރާތް ކާމިޔާބުކޮށްފައެވެ.

މިމުބާރާތުގެ ވަނަތަކަށް ބަލާއިރު އެންމެ މޮޅު ކުޅުންތެރިއަކަށް ހޮވިފައިވަނީ ހަވާސް ސްޕޯޓްސް ކުލަބުގެ ޖާޒީ ނަންބަރ 39، ނާޖިޙް މުޙައްމަދު (ނެޓޯ) އެވެ.

މިފަހަރުގެ ތަށި ހަވާސް ނެގުމާއެކު އެޓީމް ވެފައިވަނީ މިވަގުތު މީދޫގައި އޮތް އެންމެ ކާމިޔާބު ފުޓްސަލް ޓީމުގެ ގޮތުގައެވެ. މިކާމިޔާބީ އާއެކު ހަވާސްއިން ވަނީ ފުޓްސަލްގެ ޖުމްލަ 5 ތަށި ކާމިޔާބުކޮށްފައެވެ.