ހޮންކޮންގެ މީހުން ދިރިއުޅޭ ޓަވަރުތަކެއްގައި ހިނގާދިޔަ އަލިފާނުގެ ހާދިސާގައި މަރުވި މީހުންގެ އަދަދު 128 އަށް އަރައިފިއެވެ. 

ހޮންކޮންގެ ޓައި ޕޯ ޑިސްޓްރިކްޓްގައި ހުންނަ ވަންގް ފުކް ކޯޓް ރެޒިޑެންޝަލް ކޮމްޕްލެކްސްގައި މިދިޔަ ހުކުރު ދުވަހު އެގައުމުގެ ގަޑިން މެންދުރު 2:15 ގައި ފެށުނު އަލިފާންގަނޑުގައި ޖުމުލަ 128 މީހަކު މަރުވި ކަމަށް އެޤައުމުގެ ކަމާބެހޭ އޮފިޝަލުން ވަނީ ބުނެފައެވެ. މި ހާދިސާގައި 200 މީހުންގެ ޚަބަރެއް ވެފައިނުވާއިރު، މަރުވި މީހުންގެ ޢަދަދު އަދިވެސް އިތުރުވުން ވަރަށް ގާތް ކަމަށް ސަލާމަތީ ބާރުތަކުން ވަނީ ބުނެފައެވެ. 

މީޑިއާގެ ރިޕޯޓްތައް ބުނާގޮތުގައި ކަމާބެހޭ ފަރާތްތަކުން މިހާރު ވަނީ މީހުން ސަލާމަތްކުރުމުގެ މަސައްކަތް ހުއްޓާލާފައެވެ. ސަބަބަކީ އެތަނުގެ ތެރޭގައި ދިރިހުއްޓައި މީހަކު ފެނިދާނޭކަމަށް ނުބެލެވޭތީއެވެ. ނަމަވެސް ރޯވި އިމާރާތްތައް ތަހުޤީޤު ކުރުމުގެ ތެރޭގައި އެ ތަންތަނުން އިތުރު ހަށިތައް ފެނުން އެށީގެންވާ ކަމަށް އެގައުމުގެ ފުލުހުން ވަނީ ބުނެފައެވެ.

މި ހާދިސާގައި މަރުވި މީހުންގެ ތެރޭގައި އަލިފާންގަނޑު ނިންމުމުގެ މަސައްކަތުގައި އުޅުނު ފަޔަރފައިޓަރެއް ހިމެނެއެވެ. އަލިފާނުގެ ހާދިސާގައި އަނިޔާވެ ފަރުވާދެމުންދާ 79 މީހުންގެ ތެރޭގައި އަލިފާން ނިއްވުމުގައި ހަރަކާތްތެރިވި 12 ފަޔާފައިޓަރުން ހިމެނެއެވެ. 

ހޮންކޮންގައި ހިނގާދިޔަ އަލިފާނުގެ މި ހާދިސާގައި ރޯވެފައިވަނީ ޓައި ޕޯގެ 8 އުސް އިމާރާތުގެ ތެރެއިން 32 ބުރީގެ އިމާރާތެއްގައެވެ. ޖުމުލަ 2000 އެޕާޓްމެންޓް ހުންނަ އެތަނގައި ގާތަގަނޑަކަށް 4800 މީހުން ދިރިއުޅެމުންދިޔަ ކަމަށް ރިޕޯޓްތައް ބުނެއެވެ. މިތަނުން އިމާރާތެއްގެ 32 ވަނަ ބުރީގައި ރޯވެ އަލިފާންގަނޑު ވަޔާއެކު ކުޑަ ވަގުތުކޮޅެއްގެ ތެރޭގައި ވަޔާއިއެކު ވަރަށް ބޮޑަށް ފެތުރި މުޅި އިމާރާތުގައި ހިފާފައެވެ. 

މި ހާދިސާއާއި ގުޅިގެން 8 މީހަކު ވަނީ ހައްޔަރު ކުރެވިފައެވެ. މީގެ ތެރޭގައި ހިމެނެނީ 7 ފިރިހެނުންނާއި 1 އަންހެނަކު ހިމެނެއެވެ. މި 8 މީހުންނަކީ ރޯވި އިމާރާތްތައް މަރާމާތު ކުރުމަށް ހަވާލުކޮށްފައިވާ ކޮންސްޓްރަކްޝަން ކޮންޕެނީގައި މަސައްކަތް ކުރަމުންދިޔަ މީހުންނެވެ. 

މިއީ ހޮންކޮންގެ ތާރީހުގައިވެސް ހިނގާދިޔަ އެންމެ ބޮޑު އަލިފާނުގެ ހާދިސާއެވެ. މީގެ ކުރިން ހިނގާފައިވާ އެންމެ ބޮޑު އަލިފާނުގެ ހާދިސާ އެ ސިޓީގައި ހިނގާފައިވާނީ 1996 ގައެވެ.