ދުނިޔޭގެ އެކި ސަރަހައްދުތަކުގައި ހަލުވި ކަމާއިއެކު މީސަލްސް ބަލި ފެތުރެން ފަށައިފިއެވެ. 

އެގޮތުންމި އަހަރު އެމެރިކާގައި 1،798 އަށް ވުރެ ގިނަ މީހުންނަށް މި ބަލިޖެހިފައިވާ ކަމަށް ސެންޓަރސް ފޯ ޑިޒީސް ކޮންޓްރޯލް އެންޑް ޕްރިވެންޝަން އިން ބުދަ ދުވަހު އާންމުކުރި ތަފާސް ހިސާބުތަކުން ދައްކައެވެ.

މިއީ ވޭތުވެދިޔަ 33 އަހަރުގެ ތެރޭގައިވެސް އެންމެ ގިނަ އަދަދެއްގެ މީހުންނަށް މި ބަލި ޖެހުނު އަހަރެވެ. މި ބަލީގެ ސަބަބުން އެސަރަހައްދުގައި ތިން މީހަކު މަރުވެފައިވާއިރު، 212 މީހަކު ވަނީ ހޮސްޕިޓަލުގައި އެޑްމިޓްކޮށް ފަރުވާދީފައެވެ. ސެންޓަރސް ފޯ ޑިޒީސް ކޮންޓްރޯލް އެންޑް ޕްރިވެންޝަން އިން ބުނާ ގޮތުގައި މި ބަލި ޖެހުނު މީހުނެގެ ތެރެއިން %92 މީހުންނަކީ ވެކްސިން ނުޖަހާ މީހުންނެވެ.

ސިއްހީ މާހިރުން ވަކާލާތު ކުރަމުން ދާގޮތުގައި އެމްއެމްއާރު ވެކްސިން އަކީ މި ނުރައްކާތެރި ބަލި ފެތުރުނަ ނުދިނުމަށް އެޅިދާނެ އެންމެ މުހިންމު ފިޔަވަޅެވެ. މި ވެކްސިން އަކީ %97 ކާމިޔާބު ވެކްސިނެއްކަމަށް ރިޕޯޓްކޮށްފައިވެއެވެ. ސިއްހީ މާހިރުން ވިދާޅުވާ ގޮތުގައި ސަރަހައްދަކުން މި ބަލި ފެތުރުނަ ނުދީ ހިފެހެއްޓޭނީ އެ ސަރަހައްދެއްގެ %95 މީހުން ވެކްސިން ޖަހައިގެންނެވެ. ނަމަވެސް ޑަބްލިއުއެޗްއޯއިން ވިދާޅުވާގޮތުގައި ދުނިޔޭގެ ބައެއް ސަރަހައްދުތަކުގައި ވެކްސިން ޖަހައިގެން ތިބި މީހުންގެ އަދަދު މަދުވުމުން މި ބަލި ފެތުރެމުންދާ މިންވަރު މިވަނީ އިންތިހާއަށް އިތުރުވެފައެވެ. 

ހާއްސަކޮށް ތުއްތު ކުދިންނަށް ނުރައްކާތެރިކަން ބޮޑު މި ބަލިމަޑިކަމުން ސަލާމަތްވުމަށް ކުޑަކުދިންނަށް އާންމުކޮށް މީސްލްސް ވެކްސިން ދެނީ 12 މަހާއި 15 މަހާއި ދެމެދުގައެވެ، އަދި ދެވަނަ ޑޯޒެއް 4 އަހަރާއި 6 އަހަރާ ދެމެދުގެ އުމުރުފުރާއެއްގައި ދެވެއެވެ.

މީސަލްސް އަކީ ވައިގެ ޒަރީއާއިންވެސް ފެތުރޭ ނުރައްކާތެރި ބައްޔެކެވެ. މިބަލީގެ ނުރައްކާ އެންމެ ބޮޑީ 5 އަހަރުން ދަށުގެ ކުޑަކުދިންނަށެވެ. މި ބަލި ޖެހުމަށް ފަހު އާއްމުގޮތެއްގައި 10 ދުވަސް ތެރޭ ބަލި ރަނގަޅުވެއެވެ. ނަމަވެސް މި ބަލީގެ ނުރައްކާތެރި ހާލަތުގައި މަރުވުންވެސް އެކަށީގެންވެއެވެ.  

މީސަލްސްގެ ސަބަބުން ނިއުމޯނިއާ އާއި ސިކުނޑީގެ ބަލިތަކާއިވެސް ކުރިމަތިވުން އެކަށިގެންވެއެވެ. އަދި ލޯފަންވުމާއި، ކަންފަތްބީރުވުމާއި، ބޭރަށްހިންގުމާއި، ދުވަސް ނުފުރާ ވިހެއުންފަދަ ކަންކަންވެސް ކުރިމަތިވެއެވެ. 

ވޭތުވެ ދިޔަ އަހަރު އެކަނިވެސް 11 މިލިއަން މީހުންނަށް ވަނީ މި ބަލި ޖެހިގެން ރިޕޯޓުކޮށްފައެވެ.