ކްރިމިނަލް ކޯޓުގެ ޤާޒީކަމުން ހުސައިން ފާއިޒް ރަޝާދު ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ)އިން މަޖިލީހަށް މައްސަލަ ފޮނުވީ ހުރިހާ އިޖުރާއަތްތަކެއް ފުރިހަމަކުރުމަށްފަހު ކަމަށް މަޖިލީހުގެ ޖުޑިޝަރީ ކޮމެޓީން ނިންމައިފިއެވެ.

ފާއިޒް އެމަގާމުން ވަކިކުރަން ކޮމެޓީން ނިންމިއިރު، މިދިޔަ އޮކްޓޯބަރު މަހުގެ ތެރޭގައި ޤާޒީ ފާއިޒް ވަނީ ސަސްޕެންޑް ވެސް ކޮށްފައެވެ. އެގޮތުން އޭނާ ސަސްޕެންޑްކުރީ ރާއްޖެއަށް މަސްތުވާތަކެތި އެތެރެކުރުމުގައި އިސްކޮށް އުޅޭ ކަމުގެ ތުހުމަތުކުރެވޭ އަލީ އަންވަރު މުހައްމަދު ބަންދުން ދޫކޮށްލުމާއި، ނަރުސް މޭރީ ގްރޭސް މަރާލި މައްސަލައިގައި ޝަރީއަތް ނިމެންދެން ބަންދުކޮށްފައި ހުރި ހަލީމަތު ލަމްހާގެ ބަންދާ މެދު އަމަލުކުރި ގޮތުގެ މައްސަލަތަކަކާ ގުޅިގެންނެވެ.

އެ މައްސަލަތަކާއި ގުޅިގެން ފާއިޒް 60 ދުވަހުގެ މުއްދަތަކަށް ސަސްޕެންޑްކުރިއިރު، އެ ދެ މައްސަލާގައި ވެސް ޤާޒީ ފާއިޒްގެ ނިންމެވުންތަކާ މެދު ދައުލަތުން ވަނީ ހައި ކޯޓުގައި އިސްތިއުނާފުކޮށްފައެވެ.

އެ މައްސަލަތަކާއި ގުޅިގެން ޖޭއެސްސީން ނިންމީ ޤާޒީ ފާއިޒް ވަކިކުރުމަށް މަޖިލީހަށް ހުށަހެޅުމަށެވެ. އެގޮތުން ޖޭއެސްސީން ޖުޑީޝަރީ ކޮމެޓީއަށް ފޮނުވި މައްސަލައާއި ގުޅިގެން މިއަދު ބޭއްވި ކޮމެޓީގައި ވަނީ ޖޭއެސްސީން އެ އިޖުއާރަތްތައް ފުރިހަމަކޮށްފައިވާ ކަމަށް ކޮމެޓީން ވަނީ ނިންމާފައެވެ. އެކަން ކޮމެޓީން ނިންމީ ދެ ކަމަކަށް ބެލުމަށްފަހުއެވެ.

އެގޮތުން އެ ކޮމެޓީގައި ވަނީ ޖޭއެސްސީން ފޮނުވި ލިޔެކިއުންތަކުން އިޖުރާއަތް ފުރިހަމަކޮށްފައިވާކަން އެނގޭ ކަމަށާއި، އެ މައްސަލައާއި ގުޅިގެން ޤާޒީ ފާއިޒް ވެސް ޝަކުވާއެއް މަޖިލީހަށް ނުވަތަ އެހެން ތަނަކަށް ވެސް ހުށަހަޅައިފައިނުވާކަން ފާހަގަކޮށްފައެވެ.

އެހެންކަމުން ޤާޒީ ފާއިޒް ވަކިކުރުމާއި މެދު ގޮތެއް ނިންމުމަށް ތަޅުމަށް ފޮނުވުމަށް ކޮމެޓީގެ އިއްތިފާގުން މިއަދު ނިންމައިފައިވެއެވެ. 

ޤާޒީ ފާއިޒް ވަކިކުރުމަށް ކޮމެޓީން ނިންމިއިރު، އޭނާއާއި ދެކޮޅަށް ޖޭއެސްސީން ބަލަމުންއައި މައްސަލަތަކުުގެ ތެރެއިން ލަމްހާގެ މައްސަލަ ފާހަގަކުރެވެއެވެ. އެގޮތުން ލަމްހާ ދެ ފަހަރަކު ބަންދުން ދޫކޮށްލިއިރު، އެ ދެ ފަހަރު ވެސް ހައި ކޯޓުން ވަނީ އެ ނިންމުންތައް ވަނީ ބާތިލްކޮށްފައެވެ. އެންމެ ފަހުން މިދިޔަ އޮކްޓޯބަރު މަހުގެ ކުރީކޮޅު ވެސް ލަމްހާ ބަންދުން ދޫކޮށްލުމަށް ފާއިޒް ނިންމެވުމުން، ދައުލަތުން ހައި ކޯޓަށް ހުށަހެޅީ ހައި ކޯޓުން ވަނީ އަލުން ބަންދާ މެދު ގޮތެއް ނިންމަން އަމުރުކޮށްފައެވެ.

ފާއިޒްއަކީ ކުރީގެ ރައީސް އަބްދުﷲ ޔާމީން ޖަލަށްލުމަށް 2019 ވަނަ އަހަރު ހުކުމްކުރި ބެންޗުގައި ހިމެނިވަޑައިގެންނެވި ފަނޑިޔާރެކެވެ. އޭނާ ވަނީ މީގެ ކުރިން ވެސް 2021 ވަނަ އަހަރު ސަސްޕެންޑްކުރެވިފައެވެ.

އެފަހަރު ސަސްޕެންޑްކުރީ ފަނޑިޔާރުން މީހަކާ އެކު ދައްކާފައިވާ ކަމަށް ބުނާ އޯޑިއޯތަކެއް ލީކުވި މައްސަލައަކާ ގުޅިގެންނެވެ. އެހެންނަމަވެސް، އެ މައްސަލައިގެ ތަހުގީގަށް ފަހު، އޯޑިއޯތައް ސައްހަ ނޫން ކަމަށް ޖޭއެސްސީން ނިންމުމަށް ފަހު، އޭނާގެ ސަސްޕެންޝަން އުވާލައިއެކު މަގާމަށް ވަޑައިގެންނެވިއެވެ.