ކްރިމިނަލް ކޯޓުގެ ޤާޒީކަމުން ހުސައިން ފާއިޒް ރަޝާދު ވަކިކުރަން ރައްޔިތުންގެ މަޖިލީހުން ފާސްކޮށްފިއެވެ.
ފާއިޒް އެ މަގާމުން ވަކިކުރުމާއި މެދު ގޮތެއް ނިންމުމަށް މިއަދު މަޖިލީހުގައި ނެގި ވޯޓުގައި، ފާއިޒް އެ މަގާމުން ވަކިކުރަން ފެންނަ ކަމަށް 56 މެންބަރަކު ވޯޓު ދެއްވިއެވެ. ފާއިޒު މަގާމުން ވަކިކުރުމާ ދެކޮޅަށް ވޯޓު ދެއްވީ އަށް މެންބަރެކެވެ.
ކްރިމިނަލް ކޯޓުގެ ޤާޒީކަމުން ފާއިޒް ވަކިކުރަން ނިންމައިފައިވަނީ، އޭނާ އާއި ދެކޮޅަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ބަލަމުންދާ މައްސަލަތަކަކާއި ގުޅިގެންނެވެ.
އެގޮތުން މިދިޔަ އޮކްޓޯބަރު މަހުގެ ތެރޭގައި މަގާމުން އެ މަގާމުން ފާއިޒް ސަސްޕެންޑްކުރީ، ރާއްޖެއަށް މަސްތުވާތަކެތި އެތެރެކުރުމުގައި އިސްކޮށް އުޅޭ ކަމުގެ ތުހުމަތުކުރެވޭ އަލީ އަންވަރު މުހައްމަދު ބަންދުން ދޫކޮށްލުމާއި، ނަރުސް މޭރީ ގްރޭސް މަރާލި މައްސަލައިގައި ޝަރީއަތް ނިމެންދެން ބަންދުކޮށްފައި ހުރި ހަލީމަތު ލަމްހާގެ ބަންދާ މެދު އަމަލުކުރި ގޮތުގެ މައްސަލަތަކަކާ ގުޅިގެންނެވެ.
އެ މައްސަލަތަކާއި ގުޅިގެން ފާއިޒް 60 ދުވަހުގެ މުއްދަތަކަށް ސަސްޕެންޑްކުރިއިރު، އެ ދެ މައްސަލާގައި ވެސް ޤާޒީ ފާއިޒްގެ ނިންމެވުންތަކާ މެދު ދައުލަތުން ވަނީ ހައި ކޯޓުގައި އިސްތިއުނާފުކޮށްފައެވެ.
އެ މައްސަލަތަކާއި ގުޅިގެން ޖޭއެސްސީން ނިންމީ ޤާޒީ ފާއިޒް ވަކިކުރުމަށް މަޖިލީހަށް ހުށަހެޅުމަށެވެ. އެގޮތުން ޖޭއެސްސީން ޖުޑީޝަރީ ކޮމެޓީއަށް ފޮނުވި މައްސަލައާއި ގުޅިގެން އިއްޔެ ބޭއްވި ކޮމެޓީގައި ވަނީ ޖޭއެސްސީން އެ އިޖުއާރަތްތައް ފުރިހަމަކޮށްފައިވާ ކަމަށް ކޮމެޓީން ވަނީ ނިންމާފައެވެ. އެކަން ކޮމެޓީން ނިންމީ ދެ ކަމަކަށް ބެލުމަށްފަހުއެވެ.
އެގޮތުން އެ ކޮމެޓީގައި ވަނީ ޖޭއެސްސީން ފޮނުވި ލިޔެކިއުންތަކުން އިޖުރާއަތް ފުރިހަމަކޮށްފައިވާކަން އެނގޭ ކަމަށާއި، އެ މައްސަލައާއި ގުޅިގެން ޤާޒީ ފާއިޒް ވެސް ޝަކުވާއެއް މަޖިލީހަށް ނުވަތަ އެހެން ތަނަކަށް ވެސް ހުށަހަޅައިފައިނުވާކަން ފާހަގަކޮށްފައެވެ.
ޤާޒީ ފާއިޒް ވަކިކުރުމަށް ކޮމެޓީން ނިންމިއިރު، އޭނާއާއި ދެކޮޅަށް ޖޭއެސްސީން ބަލަމުންއައި މައްސަލަތަކުުގެ ތެރެއިން ލަމްހާގެ މައްސަލަ ފާހަގަކުރެވެއެވެ. އެގޮތުން ލަމްހާ ދެ ފަހަރަކު ބަންދުން ދޫކޮށްލިއިރު، އެ ދެ ފަހަރު ވެސް ހައި ކޯޓުން ވަނީ އެ ނިންމުންތައް ވަނީ ބާތިލްކޮށްފައެވެ. އެންމެ ފަހުން މިދިޔަ އޮކްޓޯބަރު މަހުގެ ކުރީކޮޅު ވެސް ލަމްހާ ބަންދުން ދޫކޮށްލުމަށް ފާއިޒް ނިންމެވުމުން، ދައުލަތުން ހައި ކޯޓަށް ހުށަހެޅީ ހައި ކޯޓުން ވަނީ އަލުން ބަންދާ މެދު ގޮތެއް ނިންމަން އަމުރުކޮށްފައެވެ.
Advertisement
This content is created and paid for by advertisers and does not involve Voice Journalists
