އޮސްޓްރޭލިއާގައި 16 އަހަރުން ދަށުގެ ކުދިންނަށް މިއަދުން ފެށިގެން ސޯޝަލް މީޑިއާ ބޭނުން ކުރުން މަނާކުރުމުގެ މަސައްކަތް ފަށައިފިއެވެ. 

އެގޮތުން މިއަދު 'މެޓާ' އިން ވަނީ ފޭސްބުކާއި އިންސްޓަގްރާމް އަދި ތްރެޑްސް ގައި ރަޖިސްޓްރީ ކޮށްފައިވާ 16 އަހަރުން ދަށުގެ ކުދިންގެ އެކައުންޓްތައް މިއަދު ޑީއެކްޑިވޭޓް ކުރަން ފަށާފައެވެ. އަދި މީގެ ފަހުން 16 އަހަރުން ދަށުގެ އެއްވެސް ކުއްޖަކަށް މެޓާގެ ޕްލެޓްފޯމަކަށް ނުވަދެވޭނެގޮތަށް މެޓާއިން ވަނީ ފިޔަވަޅު އަޅަންފަށާފައެވެ. އެހެންކަމުން ކުރިއަށް އޮތް ހަފްތާ ފެށޭއިރު އެގައުމުގައި 16 އަހަރު ނުފުރޭ ކުއްޖަކަށް ސޯޝަލް މީޑިއާ ބޭނުމެއް ނުކުރެވޭނެއެވެ. 

މިއީ މިދިޔަ އަހަރު ނޮވެންބަރު މަހު އެގައުމުގެ ސަރުކާރުން ފާސްކުރި 'އޮންލައިން ސޭފްޓީ އެމެންޑްމަންޓް' (ސޯޝަލް މީޑިއާ މިނިމަމް އޭޖް އެކްޓް) ގެ ދަށުން ނިންމާފައިވާ ނިންމުމެކެވެ. މި ގަވައިދުގައި ވާގޮތުން އެގައުމުގައި ސޯޝަލް މީޑިއާ ބޭނުންކުރެވޭނީ 16 އަހަރުން މަތީގެ މީހުންނަށެވެ.

މި 'ސޯޝަލް މީޑިއާ ބޭން' ރަސްމީކޮށް ފެށުމަށް ހަމަޖެހިފައިވަނީ މިމަހުގެ 10 ވަނަ ދުވަހެވެ. 

އަދި މި ގާނޫނުގައި ސޯޝަލް މީޑިއާ ކުންފުނިތަކަށް 16 އަހަރުން ދަށުގެ އެކައުންޓްތައް ބްލޮކް ނުވަތަ ޑިލީޓް ކުރުމުގެ ޒިންމާ ހަވާލުކޮށްފައިވެއެވެ. އެގޮތުން މި ޒިންމާ އަދާނުކޮށްފިނަމަ 49.5 މިލިއަންޑޮލަރާއި ހަމައަށް އެ މީޑިއާ ކުންފުނިތައް ޖޫރިމަނާ ކުރުމުގެ ބާރު އެގައުމުގެ ސަރުކާރަށް ލިބިގެންވެއެވެ. 

މި ގަވައިދުގެ ދަށުން އަދި އެގަމުގެ ކުޑަކުދިންނަށް ބޭނުން ކުރުން މަނާކޮށްފައިވަނީ ފޭސްބުކް، އިންސްޓަގްރާމް، ޓިކްޓޮކް، ސްނެޕްޗެޓް، އެކްސް (ކުރިން ޓްވިޓަރ)، ޔޫޓިއުބް، ރެޑިޓް، ޓްވިޗް، ކިކް އަދި ތްރެޑްސްއެވެ.

އޮސްޓްރޭލިއާގެ ތަފާސް ހިސާބުތަކުން ދައްކާގޮތުގައި އެގައުމުގެ 16 އަހަރުން ދަށުގެ އުމުރުފުރާގެ %96 ކުދިން ސޯޝަލް މީޑިއާ ބޭނުންކުރެއެވެ. މީގެ ސަބަބުން ކުރިމަތިވާ ގެއްލުންތަކުގެ ސަބަބުން ކުޑަކުދިންނަށް ސޯޝަލް މީޑިއާ މަނާކުރުމުގެ ފިޔަވަޅު އެގައުމުން ވަނީ ހަރުކަށިކޮށް އަޅާފައެވެ.

އެ ގައުމުގެ ސަރުކާރުން ބުނާގޮތުގައި 16 އަހަރުން ދަށަށް ސޯޝަލް މީޑިއާ މަނާކުރުމުގެ މަގުސަދަކީ ކުޑަކުދިންގެ ނަފްސާނީ ސިއްހަތު ރައްކާތެރިކުރުމާއި، ގެއްލުން ހުރި ކޮންޓެންޓަށް ހުށަހެޅުން މަދުކުރުމާއި، ސައިބަރ ބުލީފަދަ ނުރައްކާތެރި ކަންކަމުން އެކުދިން ދުރުހެލިކުރުމެވެ.