ދުންފަތުގެ އިސްތިޢުމާލުކުރުމީ، ތިމާގެ އަމިއްލަ ނަފުސަށާއިމުޅި މުޖުތަމަޢުގެ ޙައްޤުގައި ކުރެވޭ ބޮޑު އަނިޔާއެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.

ދުންފަތުގެ އިސްތިޢުމާލު ކުރުމުގެ ނުބައި ކަމަށް އަލިއަަޅުވާލައި މިއަދު އިއްވި ހުކުރު ޚުތުބާގައި ބުނީ، ދުންފަތަކީ، ވަރަށް ގިނަ ގޮތްގޮތުން ގެއްލުން ހުރި އެއްޗެއްކަން، ކަމާ ގުޅޭ ގޮތުން ކުރެވިފައިވާ އެންމެހައި ދިރާސާތަކުން ސާބިތުވެފައިވާ ކަމަށެވެ. އެހެނަސް، ދުންފަތުގެ އިސްތިޢުމާލުކުރާ މީހުން، އެ ކަމާ މެދު މާބޮޑު ފަރުވާލެއް ނުބަހައްޓައި، އެ ކަން ކުރާކަމަށެވެ.

މާތް ﷲ ވަޙީކުރައްވައިފައިވާ ބަސްފުޅުގެ މާނައީ: "އަދި ތިޔަބައިމީހުންގެ އަތްތަކުން ތިޔަބައިމީހުންގެ ނަފުސުތައް ހަލާކުގެ ތެރެއަށް އެއްލައިނުލާށެވެ!"

މިއާއެކު ޚުތުބާގައިވަނީ ދުންފަތުގެ އިސްތިޢުމާލުކުރުމުން ލިބޭ ސިއްޙީ ގެއްލުންތަކުގެ މައްޗަށް އަލިއަޅުވާލާފައެވެ. އަދި ދުންފަތުގެ އިސްތިޢުމާލުކުރުމުން އެ ކަން ކުރާ މީހުންގެ އިތުރުން އެކަމަށް ހުށަހެޅޭ މީހުންނަށްވެސް ބޮޑެތި ގެއްލުން ލިބޭ ކަމަށް ބުންޏެވެ.

ރަސޫލު ﷺ ޙަދީޘްކުރައްވައިފައި ވެއެވެ. (فَإِنَّ الْمَلَائِكَةَ تَتَأَذَّى مِـمَّا يَتَأَذَّى مِنْهُ بَنُوْ آدَم) މާނައީ: "ހަމަކަށަވަރުން، އާދަމުގެދަރީންނަށް އުނދަގޫވާ ކަންތައްތަކުން މަލާއިކަތްބޭކަލުންނަށް ވެސް އުނދަގޫފުޅު ވެއެވެ.

ޚުތުބާގައި ވަނީ ދުންފަތުގެ އިސްތިޢުމާލުކުރުމީ، ތިމާގެ އަމިއްލަ ނަފުސަށާއިމުޅި މުޖުތަމަޢުގެ ޙައްޤުގައި ކުރެވޭ ބޮޑު އަނިޔާއެއްކަން ފާހަގަކޮށް، އެ ސުންޕާ ވަބާއިންމުޖުތަމަޢު ސަލާމަތްކުރުމަށް ޓަކައި، ވަރުގަދަ ޢަޒުމަކާއެކު ކުރިމަތިލުމަށް ނަޞޭޙަތްތެރިވެފައެވެ.