ސެލޫނެއްގެ ތެރޭގައި މާރާމާރީ ހިންގައި ފުލުހުންގެ ވާޖިބަށް ހުރަސްއެޅި މައްސަލާގައި ފުލުހަކު ހައްޔަރު ކޮށްފިއެވެ.

މައްސަލައިގައި ހައްޔަރު ކޮށްފައިވަނީ އަލީ މަނިކު، 43، އަސަރީވިލާ/ސ. ހިތަދޫ އެވެ.

ކޯޓު އަމުރުގައިވާގޮތުން އޭނާ ހައްޔަރުކޮށްފައިވަނީ ސީނުން ކަމަށެވެ.

އަދި ހައްޔަރުކޮށްފައި ހުއްޓާ ވެއްޓި އޭނާގެ ހަރަކާތްތައް ދަށްވުމުން ހޮސްޕިޓަލަށް ގެންގޮސް ފަރުވާ ދެމުންދާކަމަށްވެސް ކޯޓު އަމުރުގައިވެއެވެ. 

އެހެންކަމުން، އޭނާ ބަންދުގެ އަޑުއެހުމަށް ހާޒިރުނުކުރެވޭތީ، ހޮސްޕިޓަލުން ދޫކޮށްލުމާ އެކު 24 ގަޑިއިރު ތެރޭ ފަނޑިޔާރެއްގެ ކުރިމައްޗަށް ހާޒިރުކުރުމަށް ގާޒީ އައިޝަތު ނުޒުހާ އަމުރުކުރައްވާފައިވެ އެވެ. 

މީގެ އިތުރުން އަލީ މަނިކު އަކީ ގާނޫނު ތަންފީޒުކުރަމުންދާ ފަރާތެއް ކަމަށް އައިއޯ ފާހަގަކޮށްފައިވާއިރު އޭނާގެ ބަންދަށް ޖަހާފައިވަނީ 5 ދުވަހެވެ. 

މި މައްސަލައާ ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، މާލޭގައި ހުންނަ ސެލޫނަކަށް މީހަކު ވަދެ އެތަނުގައި ހަމަނުޖެހުން ހިންގާ ތަކެއްޗަށް ގެއްލުންދީ އެތަނުގެ މުވައްޒަފަކާ މާރާމާރީ ހިންގާ މިމަހު 5 ވަނަ ދުވަހު ފުލުހުންނަށް ރިޕޯޓްކޮށްފައިވާ ކަމަށެވެ. 

މިމައްސަލައާ ގުޅިގެން ހައްޔަރުކޮށްފައިވަނީ ފުލުސްމީހާ ސީނަށް ދިޔަ ފުލުހަކާ ކުރިމަތިލައި މާރާމާރީ ހިންގައި ފުލުހުންގެ ދައުރު އަދާކުރުމަށް ހުރަސްއަޅާފައިވާ ކަމަށްވެސް ވިދާޅުވިއެވެ.

”މިމައްސަލާގައި ހައްޔަރުކޮށްފައިވަނީ ފުލުހެއް. އަދި މި މުވައްޒަފުގެ މައްޗަށް ތުހުމަތު ކުރެވުނު ޖިނާއީ މައްސަލާގައި ހައްޔަރުކުރުމާ ގުޅިގެން 2025 ޑިސެންބަރު 6 ވަނަ ދުވަހުން ފެށިގެން ވަނީ މުސާރަ ނުލިބޭގޮތަށް ސަސްޕެންޑް ކުރެވިފައި. އޭނާގެ މައްޗަށް ތުހުމަތު ކުރެވުނު ޖިނާއީ މައްސަލަ ދަނީ ތަހުގީގު ކުރަމުން އަދި އެ މައްސަލައާ ގުޅިގެން އިދާރީގޮތުން އޭނާއާމެދު އަޅަންޖެހޭ ފިޔަވަޅު އެޅުމަށްޓަކައި ކުރަންޖެހޭ މަސައްކަތް ޕްރޮފެޝަނަލަ ސްޓޭންޑަޑްސް ކޮމާންޑުން ދަނީ ކުރަމުން.“ އޮފިޝަލް ވިދާޅުވިއެވެ.