ރާއްޖޭގައި އަލިފާނުގެ ހާދިސާތައް އެންމެ ގިނައިން ހިނގަނީ މާލެ ސަރަހައްދުގައި ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ނެރުނު ރިޕޯޓެއްގައި ބުނެފިއެވެ.
އެންޑީއެމްއޭއިން މިއަދު ހިއްސާކުރި މިދިޔަ އަހަރުގެ ކާރިސާތަކުގެ ތަފާސްހިސާބު ރިޕޯޓުން ދައްކާ ގޮތުގައި މުޅި ރާއްޖެއަށް ބެލި ނަމަވެސް އެންމެ ގިނައިން އަލިފާނުގެ ހާދިސާތައް ހިނގަނީ މާލެ އަދި ހުޅުމާލޭގައެވެ.
މިދިޔަ އަހަރު ރާއްޖޭގައި އަލިފާނުގެ 83 ހާދިސާއެއް ހިނގާފައިވާއިރު އެ ހާދިސާތަކުގެ 77 އިންސައްތަ ހާދިސާ ހިނގާފައިވަނީ މާލެ އަތޮޅުގައެވެ. މާލެ ސަރަހައްދުގައި އަލިފާނުގެ 61 ހާދިސާއެއް ހިނނގާފައިވާއިރު، މާލީގޮތުން ދެވަނައަށް އެންމެގިނައިން މާލީ އެހީތެރިކަން ފޯރުކޮށްދީފައިވަނީ އަލިފާނުގެ ހާދިސާތަކުން ލިބުނު ގެއްލުންތަކަށެވެ. އަލިފާނުގެ ހާދިސާތަކުގައި އެހީގެ ގޮތުގައި 23 މިލިއަނަށްވުރެ ގިނަ ރުފިޔާ ދީފައިވާކަމަށް އެންޑީއެމްއޭގެ ރިޕޯޓުން ދައްކައެވެ.
ނިމިގެންދިޔަ 2024 ވަނަ އަހަރު ރާއްޖޭގައި 251 ހާދިސާއެއް ހިނގާފައިވާއިރު، މިއީ އޭގެ ކުރީ އަހަރާ އަޅާބަލާއިރު، 68 ހާދިސާގެ އިތުރުވުމެކެވެ. އެންޑީއެމްއޭގެ ރިޕޯޓުން ދައްކާގޮތުގައި 2023 ވަނަ އަހަރު 183 ހާދިސާ ހިނގިއިރު އޭގެ ކުރީ އަހަރު ހިނގިކަމަށް ރިޕޯޓްކޮށްފައިވަނީ 144 ހާދިސާއެވެ.
ފެންބޮޑުވުމާއި އަލިފާނުގެ ހާދިސާތަކަށްފަހު ދެން އެންމެގިނައިން ހިނގާފައިވަނީ ވައިގަދަވުމުގެ ސަބަބުން ކުރިމަތިވި ހާދިސާތަކާއި ވިއްސާރައިގެ ސަބަބުން ކުރިމަތިވި ހާދިސާތަކުގެ އިތުރުން ގޭސްފުޅި ގޮވުމުގެ ހާދިސާތަކެވެ.
Advertisement
This content is created and paid for by advertisers and does not involve Voice Journalists
