އެމެރިކާގެ ޑޮނަލްޑް ޓްރަމްޕްގެ ސަރުކާރުން އެ ގައުމަށް ދަތުރުކުރުން މަނާކޮށްފައިވާ ގައުމުތަކުގެ ލިސްޓަށް ޤައުމުތަކެއް އިތުރުކުރަން ނިންމައިފިއެވެ.

އެކަން ކުރަން ނިންމާފައިމިވަމީ، އަފްޣާނިސްތާނުގެ މީހެއް ކަމަށް ބުނާ މީހަކު އެމެރިކާގެ ދެ ނޭޝަނަލް ގާޑު މެމްބަރުންނަށް ބަޑިޖެހި ހާދިސާއާގުޅިގެން، އެ ގައުމުގެ އިމިގްރޭޝަން ގަވާއިދުތައް ހަރުކަށިކުރުމަށް އަޅާ ފިޔަވަޅެއްގެ ގޮތުން ކަމަށް ހޯމްލޭންޑް ސެކިއުރިޓީގެ ސެކްރެޓަރީ ކްރިސްޓީ ނޯއެމް ވަނީ ބުނެފައެވެ.

އެމެރިކާގެ ދެ ނޭޝަނަލް ގާޑު ސިފައިންނަށް ބަޑިޖެހި ހާދިސާއަށްފަހު، އަފްޣާނިސްތާން، ސޯމާލިއާ، އީރާން އަދި ހެއިޓީ ހިމެނޭހެން، ކުރީގެ ބޭންގައި ހިމެނޭ 19 ގައުމުގެ މައްޗަށް ހެދިފައިވާ ދަތުރުފަތުރުގެ ގަވާއިދުތައް އެމެރިކާއިން ވަނީ ހަރުކަށިކޮށްފައެވެ.

އެކަމާ ގުޅިގެން ފޮކްސް ނިޔުސްއަށް ދިން ބަސްދީ ގަތުމެއްގައި އެމެރިކާގެ ހޯމްލޭންޑް މިނިސްޓަރު ވަނީ އެ ގައުމަށް ދަތުރުުރުން މަނާ ގައުމުތަކުގެ ލިސްޓު 30 އަށްވުރެ ވެސް ގިނަ ކުރަން ނިންމާފައިވާ ކަމަށެވެ. 

ނަމަވެސް އަޕްޑޭޓްކުރެވޭ ލިސްޓު ނެރޭނެ އިރާ، އެ ތަންފީޒުވާނެ ވަގުތެއް ނުވަތަ އިތުރުވާނެ ގައުމުތަކާ މައުލޫމާތު ދީފައެއް ނުވެއެވެ.

ފާއިތުވި ހަފްތާގައި އެމެރިކާއިން ވަނީ ކުރިން މަނާކޮށްފައިވާ 19 ގައުމުން ޔޫއެސް އަށް އައިސްފައިވާ މީހުންނަށް އިމިގްރޭޝަންގެ ޚިދުމަތްތައް ދިނުން ވެސް ވަގުތީ ގޮތުން ހުއްޓާލާފައިއެވެ.