އެކްސްޕޯޓު ވިޔަފާރިން މިއަހަރުގެ މިހާތަނަށް ޗައިނާއަށް 1 ޓްރިލިއަން ޑޮލަރުގެ ފައިދާއެއް ލިބިއްޖެއެވެ. 

މިއީ އެގައުމުގެ ތާރީހުގައިވެސް މި ވިޔަފާރިން އެހާ ބޮޑު ފައިދާއެއް އެގައުމަށް ލިބުނު ފުރަތަމަ ފަހަރެވެ. 

އެންމެ ފަހުގެ ހިސާބުތަކުން ދައްކާގޮތުގައި މިއަހަރުގެ ނޮވެންބަރުގެ ނިޔަލަށް ފައިދާގެ ގޮތުގައި 1.076 ޓްރިލިއަން ޑޮލަރު އެގައުމަށް ލިބިފައިވެއެވެ. މިކަމުގެ ސަބަބަކީ އެގައުމުން ބޭރުކުރާ މުދަލުގެ މިންވަރު އިތުރުކުރުންކަމަށް އެގައުމުގެ ސަރުކާރުން ބުނެފައިވެއެވެ. 

އެގޮތުން މިދިޔަ ނޮވެންބަރު މަހު އެކަނިވެސް އެގައުމުގެ އެކްސްޕޯޓުތައް %5.9 އިތުރުވެފައިވެއެވެ. އަދި އެ މަހުގެ ތެރޭގައި އިންޕޯޓުތައް އިތުރުވެފައިވަނީ %1.9 އަށެވެ. އެހެންކަމުން އެ މަހުގެ ތެރޭގައި އެކަނިވެސް ޗައިނާގެ އިންޕޯޓު އެކްސްޕޯޓު ވިޔަފާރީގެ ފައިދާ 112 ބިލިއަން ޑޮލަރަށް އަރައެވެ. 

ޗައިނާއިން ވަނީ މިއަހަރުގެ ތެރޭގައި އެމެރިކާއަށް އެކްސްޕޯޓުކުރާ މުދަލުގެ މިންވަރު މަދުކޮށްފައެވެ. އެއީ އެގައުމަށް މުދާ އެތެރެކުރާއިރު ނަގާ ޓެރިފަތަކާއި އިތުރު ފީތަކުގެ އަގު ބޮޑުކޮށްފައިވުމުން ކަމަށް އެގައުމުން އަންގައެވެ. އެގޮތުން މިދިޔަ ނޮވެންބަރު މަހު އެކަނިވެސް އެމެރިކާއަށް ކުރި އެކްސްޕޯޓުތައް %28-29 ވަނީ ދަށްވެފައެވެ. ނަމަވެސް ޗައިނާއިން ވަނީ ޔޫރަޕާއި، އޭޝިއާއާއި، އޮސްޓްރޭލިއާ ފަދަ އެހެން ގައުމުތަކަށް އެކްސްޕޯޓު ވިޔަފާރި ފުޅާކޮށްފައެވެ. އަދި އެކްޕޯޓުކުރެވޭ މުދަލުގެ ބާވަތް ކަރަންޓު ސާމާނާއި، މެޝިންފަދަ އަގުބޮޑެތި މުދަލަށް ބަދަލުކޮށްފައެވެ. 

ޗައިނާއަށް އިންޕޯޓު އެކްސްޕޯޓު ވިޔަފާރިން 2024 ވަނަ އަހަރު ލިބިފައިވަނީ 992 ބިލިއަން ޑޮލަރުގެ ފައިދާއެކެވެ. އެހެންކަމުން މިއަހަރުގެ މިހާތަނަށް އެ ވިޔަފާރިން 1 ޓްރިލިއަން ޑޮލަރުގެ ފައިދާއެއް ލިބުމަކީ އެގައުމުގެ އިގްތިސާދަށް ލިބުނު ބޮޑު ކުރިއެރުމެކެވެ.