ދަނޑުގޮވާންކުރުމާއި، މަހަށްފަރަށް ދިއުމާއި، ދިރިއުޅުމަށް މަސައްކަތްކުރުމަކީ ދަށުދަރަޖައިގެ ކަމެއް ނޫން ކަމަށް މިއަދުގެ ހުކުރު ޚުތުބާގައި ހަނދާންކޮށްދީފިއެވެ. 

މަސައްކަތްތެރި ބަޔަކަށް ވުމަށްބާރުއަޅައި މިއަދު އިއްވި ހުކުރު ޚުތުބާގައި، ބުނީ، އިސްލާމްދީނަކީ، ދުނިޔެއާއި އާޚިރަތުގެ ދީނެއް ކަމަށެވެ. އަދި އިންސާނުން ދިރިއުޅުމަށް ޓަކައި، ދުނިޔެ ޢިމާރާތްކޮށް އާރާސްތުކުރުމަކީ، އިންސާނާގެ މަސްއޫލިއްޔަތެއް ކަމަށާ، އިންސާނުންނަށް ބޭނުންވާ ޚިދުމަތްތައް ފޯރުކޮށްދިނުމަކީ، ކޮންމެވެސް އެއް ބަޔަކު ކުރާންޖެހޭނެ ކަމެއް ކަމަށެވެ.

މަސައްކަތްކުރުމަށް ގޮވައިލައްވައި، މާތް الله ވަޙީކުރައްވައިފައިވާ އާޔަތެއްގެ މާނައިގައި ވެއެވެ. "ފަހެ، ނަމާދުކޮށް އަވަދިވެއްޖެ ހިނދު، ފަހެ، ތިޔަބައިމީހުން ބިމުގައި ފެތުރިގަންނާށެވެ! (އެބަހީ: ޙަޔާތުގެ މައިދާނަށް ނުކުންނާށެވެ!) އަދި ތިޔަބައިމީހުން اللهގެ فضل ވަންތަކަމުން (ދެއްވުމަށް) އެދޭށެވެ! އަދި ތިޔަބައިމީހުން ގިނަގިނައިން الله ހަނދުމަކުރާށެވެ! އެއީ ތިޔަބައިމީހުން ދިންނަވައި نصيبލިބުމަށް ޓަކައެވެޒ 

އިސްލާމް ދީނުގައި، ހުއްދަކުރައްވައިފައި ވަނީ ޙަލާލު ގޮތުގައި އާމްދަނީ ހޯދުން ކަމަށާ ރިބާއާއި ޖުވާގެ މުޢާމަލާތްތައް ޙަރާމްކުރައްވައިފައި ވާއިރު، ވިޔަފާރިކުރުން ވަނީ ހުއްދަކުރައްވައިފައިކަންވެސް ޚުތުބާގައި ފާހަގަކޮށްފައިވެއެވެ. ހަމަ އެފަދައިން، ބަނގުރާއާއި އޭގެ ވިޔަފާރި ޙަރާމްކުރައްވާފައކވާކަންވެސް މިއަދުގެ ޚުތުބާގައި ފާހަގަކޮށްފައި ވެއެވެ.

ދިރިއުޅުމަށް މަސައްކަތްކުރުމަށް އިސްލާމްދީނުގައި އަންގަވާފައިވުމުން، މުސްލިމުންނަކީ އިޤުތިޞާދީ ގޮތުން ފުދުންތެރި ބަޔަކަށް ވާންޖެހޭނެ ކަމަށް ޚުތުބާގައި ބުނެފައި ވެއެވެ. އެފަދަ ބަޔަކަށް ވެވޭނީ، އެއުރެންނީ މަސައްކަތް ދަންނަ، މަސައްކަތްކޮށްގެން ތަކެތި އުފައްދާ ބަޔަކަށް ވެގެން ކަމަށްވެސް ބުންޏެވެ.

ޚުތުބާގައި އިތުރަށް ވަނީ ދަނޑުގޮވާންކުރުމާއި، މަހަށްފަރަށް ދިއުމާއި ދިރިއުޅުމަށް ޓަކައި މަސައްކަތްކުރުމަކީ، ދަށުދަރަޖައިގެ ކަމެއް ނޫންކަން ހަނދާންކޮށްދީފައެވެ.

ކީރިތި ރަސޫލާ ﷺ ޙަދީޘްކުރައްވައިފައި ވެއެވެ. (مَا أَكَلَ أَحَدٌ طَعَامًا قَطُّ خَيْرًا مِنْ أَنْ يَأْكُلَ مِنْ عَمَلِ يَدِهِ، وَإِنَّ نَبِيَّ اللهِ دَاوُدَ عَلَيْهِ السَّلَامُ كَانَ يَأْكُلُ مِنْ عَمَلِ يَدِهِ) މާނައީ: "މީހެއްގެ އަމިއްލަ އަތުންކުރާ މަސައްކަތުން ހޯދާ އެއްޗަކަށް ވުރެ، ހެޔޮ އެއްޗެއް، އޭނާއެއް ނުކައެވެ.

އެހެން ބަޔެއްގެ މައްޗަށް ބަރޯސާވުމުގެ ބަދަލުގައި، ބޭނުންތައް ފުއްދާނެ ގޮތްތަކާއި، ވަސީލަތްތައް އަމިއްލައަށް އުފައްދައި، އޭގެ ބޭނުންހިފާ ބަޔަކުކަމުގައި ވުމަށް ޚުތުބާގައި ގޮވައިލާފައިވެއެވެ. މުސްލިމުންނަކީ، މާތް الله އެބައިމީހުން މި ބިންމަތީގައި ބާރުވެރިކުރައްވައިފި ނަމަ، ނަމާދުޤާއިމުކޮށް، އަމުރުމަޢުރޫފު ހިންގާން ޖެހޭ ބަޔެއް ކަމަށާ މިނިވަން ވެރިކަމެއް ކުރާން ޖެހޭ ބަޔެއް ކަމަށްވެސް ބުންޏެވެ.

އަދި މި ކަންކަން ކުރެވޭނީ މުސްލިމުންނަކީ ބާރުވެރި މިނިވަން ބަޔަކަށް ވެގެންނާއި، ފުދުންތެރި އިޤްތިޞާދެއް އޮތް ބަޔަކަށް ވެގެންނާއި، ސަރަހައްދު ޙިމާޔަތްކުރެވޭ ފަދަ ވަސީލަތްތަކެއް ހުރި ބަޔަކަށް ވެގެންނާއި، ދުނިޔެއަށް އަންނަ ޢިލްމީ ކުރިއެރުންތަކާ ފައިހަމަކުރެވޭ ބައަކަށް ވެގެންނާއި، ޢިލްމު އުނގެނި، އަމިއްލަ ފައިމައްޗަށް ތެދުވެތިބި، ހީވާގި، އުފެއްދުންތެރި ބަޔަކަށް ވެގެންކަން ޚުތުބާގައި ވަނީ ބުނެފައެވެ.