ރާއްޖޭގެ ކޮންމެ އަތޮޅަކުން، މަދުވެގެން އެއް ސަރަޙައްދެއްގައި އެސްޓީއޯ ރޭޓްގައި ތެޔޮ ލިބޭނެ އިންތިޒާމް ހަމަޖެއްސުމުގެ މަޝްރޫއުގެ ތެރެއިން، ފިއުލް ސަޕްލައިސް މޯލްޑިވްސްގެ މޮޑިއުލަރ ސްޓޭޝަނެއް ރ. އަތޮޅުގައި ގާއިމްކޮށްފިއެވެ.
މި މޮޑިއުލަރ ސްޓޭޝަން ގާއިމްކޮށްފައިވަނީ ރ. ދުވާފަރުގައެވެ.
45 ވަނަ މަސްވެރިންގެ ދުވަހުގެ ޚާއްޞަ ޕްރޮގްރާމްގެ ތެރެއިން އިއްޔެ، މި ސްޓޭޝަން ހުޅުވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
މިތަނުން މަސްވެރިންގެ އިތުރުން، ރަށުގެ ރައްޔިތުންނަށް ތެލުގެ ޚިދުމަތް ފަސޭހަކަމާއިއެކު ލިބިގެންދާނެކަމަށް އެސްޓީއޯއިން ބުނެފައިވެއެވެ.
އެސްޓީއޯ ރޭޓުގައި ރާއްޖޭގެ އަތޮޅުތަކުން ތެޔޮ ލިބޭނޭ އިންތިޒާމު ހަމަޖެއްސުމަކީ ރައީސް މުޢިއްޒުގެ ރިޔާސީ ވަޢުދެކެވެ.
އަދި ރޭ ދުވާފަރުގައި ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވަނީ، ކޮންމެ އަތޮޅެއްގެ ކަނޑައަޅާފައިވާ ރަށްރަށުގައި އެސްޓީއޯގެ ފިއުލް ސްޓޭޝަންތައް ގާއިމްކުރަމުންގޮސް މިއަންނަ މާޗްމަސް ނިމެންވާއިރަށް ވައުދުވިގޮތަށް އެ މަސައްކަތް ފުރިހަމަ ކުރެވޭނޭކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
