ސަރުކާރު ކުންފުނިތަކުގެ ތެރެއިން މިއަހަރުގެ ފުރަތަމަ ކުއާޓަރު ނިމުނުއިރު މާލީގޮތުން އެންމެ ރަނގަޅު ނަތީޖާއެއް ހޯދި ކުންފުންޏަކަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ހިމެނިއްޖެއެވެ.

ސަރުކާރު ކުންފުނިތަކުގެ ބަލަދުވެރިފަރާތް ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ) އިން މިއަދު އާއްމުކުރި މިއަހަރުގެ ފުރަތަމަ ކުއާޓަރުގެ މާލީތަފާސްހިސާބުތަކަށް ބަލާއިރު މި މުއްދަތުގެ ތެރޭގައި އެންމެ ހިންގުން ރަނަގޅު އެއް ކުންފުންޏަކީ އެޗްޑީސީއެވެ. ކުންފުނި ހިންގުން ރަނގަޅުކަން އެންމެ ރަނގަޅަށް އަންގައިދޭ އެއް ކަމަކީ ކުންފުނީގެ ހަރަދުތަކާއި ނަފާ ރަނގަޅު މިންގަނޑެއްގައި ހުރުމެވެ.

ޕީސީބީން އާއްމުކުރި ތަފާސްހިސާބަށް ބަލާއިރު، ފުރަތަމަ ކުއާޓަރުގައި އެޗްޑީސީއަށް ވަނީ އާމްދަނީގެ ގޮތުގައި 432.4 މިލިއަން ރުފިޔާ ލިބުނުއިރު ފައިދާގެ ގޮތުގައި 268.5 މިލިއަން ރުފިޔާ ވަނީ ލިބިފައެވެ. މި މުއްދަތުގެ ތެރޭގައި ޕްރޮޕަޓީ ވިއްކައިގެން 268.6 މިލިއަން ރުފިޔާ ވަނީ ލިބިފައެވެ. މި ކުއާޓަރުގެ ތެރޭގައި އެޗްޑީސީ ހިންގުމުގެ ހަރަދުތައް 208 މިލިއަން ރުފިޔާއަށް ދަށްކޮށްފައިވާއިރު، މިދިޔަ އަހަރުގެ ފުރަތަަމަ ކުއާޓަރުގައި ހިންގުމުގެ ހަރަދުތައް ހުރީ 238 މިލިއަން ރުފިޔާގައެވެ. 

މި ކުއާޓަރު ނިމުނުއިރު އެޗްޑީސީގައި ފައިސާގެ ގޮތުގައި ބެލެވޭގޮތަށް ހުރި އަދަދާއި ހަރުމުދަލުގެ އަގު އިތުރުވެފައިވާއިރު، ދަރަންޏާއި ލޯނުގެ ގޮތުގައި އަދާކުރަން ހުރި އަދަދު ވަނީ ނިސްބަތުން ދަށަށްގޮސްފައެވެ.

މިއަހަރުގެ ފުރަތަމަ ކުއާޓަރުގައި އެޗްޑީސީއަށް މާލީގޮތުން އެދެވޭފަދަ ކުރިއެރުމެއް ލިބުނުނަމަވެސް ސަރުކާރުގެ 12 ކުންފުންޏަކަށް ފުރަތަމަ ކުއާޓަރުގައި ވަނީ ގެއްލުންވެފައެވެ. މީގެ ތެރެއިން ބައެއް ކުންފުނިތަކަށް ގެއްލުންވިނަމަވެސް ގެއްލުންވި ނިސްބަތް އިތުރުނުވެ ހިފަހައްޓާފައިހުރިކަން ފާހަގަކޮށްލެވެއެވެ.