ރާއްޖެއަށް އެންމެ ފުރަތަމަ އުދުހުންތައް ބާއްވަން ފެށި ސްރީލަންކަން އެއާލައިނުން ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލް ބޭނުންކުރަން ފަށައިފިއެވެ.
ސްރީލަންކަންއިން ޓާމިނަލް ވަން ބޭނުންކުރަން ފެށުމުގެ ގޮތުން މިއަދު ވީއައިއޭގައި ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ ރާއްޖޭގައި ހުންނަވާ ލަންކާ ސަފީރު މުހައްމަދު ރިޒްވީ ހަސަންއެވެ. ރަސްމިއްޔާތުގައި ސްރީލަންކަން އެއާލައިންސްގެ ކަންޓްރީ މެނޭޖަރު ނަޔޯމީ ޓެނަކޫން އާއި އެމްއޭސީއެލްގެ އިސްވެރިން އަދި އޮފިޝަލުން ބައިވެރިވެވަޑައިގެންނެވިއެވެ.
ސްރީލަންކަން އިން އައު ޓާމިނަލް ބޭނުންކުރަން ފެށުން... ފޮޓޯ: އެމްއޭސީއެލް
އެމްއޭސީއެލުން ބުނީ ޓާމިނަލް 1 ކުން ސްރީލަންކަން އެއާލައިންސް އަށް ހިދުމަތް ދޭން ފެށުމުގެ ގޮތުން މިއަދު ވަނީ އެ އެއާލައިންގެ ކައުންޓަރުތައް ރަސްމީކޮށް ހުޅުވައި, އެ އެއާލައިނުން ފުރި 115 ފަސިންޖަރުންނަށް ހަދިޔާ ދީފައެވެ. މީގެ އިތުރުން މިއަދު ވަނީ ޓާމިނަލް 1 އަށް ކައިރި ކުރި ސްރީލަންކަން އެއާލައިންސްގެ ފުރަތަމަ ފްލައިޓް, UL101އިން ރާއްޖެ އައި 277 ފަސިންޖަރުންނަށް ސަގާފީ ހަރަކާތްތަކާއެކު ހޫނު މަރުހަބާއެއް ކިޔައިފައެވެ.
ސްރީލަންކަން އެއާލައިނުން ޒިޔާރަތްކުރި ފަތުރުވެރިންނަށް އައު ޓާމިނަލުން މަރުހަބާކިޔުން ... ފޮޓޯ: އެމްއޭސީއެލް
ސްރީލަންކަން އެއާލައިންސް އަކީ ޓާމިނަލް 1 އިން ހިދުމަތް ދޭން ފެށި ސްރީ ލަންކާގެ ދެވަނަ އެއާލައިނެވެ. ސްރީލަންކަން އެއާލައިނުން ރާއްޖެއަށް އުދުހުންތައް ފަށާފައިވަނީ 1979 ވަނަ އަހަރުގެ ސެޕްޓެމްބަރުމަހުގެ 1 ވަނަ ދުވަހުއެވެ. ސްރީލަންލަންކަން އެއާލައިނުން އައު ޓާމިނަލް ބޭނުންކުރަން ފަށާފައިވާއިރު، މިހާރު 33 އެއާލައިނަކުން އައު ޓާމިނަލް ބޭނުންކުރަމުންދާކަމަށް އެމްއޭސީއެލުން ބުނެއެވެ.
Advertisement
This content is created and paid for by advertisers and does not involve Voice Journalists
