މިއަހަރުގެ ދިރާސީ އަހަރު ނިންމައި، ރިޕޯޓްފޯމް ލިބުމާއެކު ދަރިވަރުންގެ ބޮޑުޗުއްޓީ ފެށިއްޖެއެވެ.

މިހިނގާ ދިރާސީ އަހަރުގެ ދެވަނަ ޓާމުގެގެ ރިޕޯޓްފޯމް މާލެ އާއި އަތޮޅުތަކުގެ ސްކޫލްގެ ދަރިވަރުންނަށް ވަނީ ދޫކުރަން ފަށާފައެވެ. ބޮޑުޗުއްޓީ ނިންމައި ކުރިއަށްއޮތް ދިރާސީ އައު އަހަރުގެ ކިޔެވުން ފެށުމަށް ހަމަޖެހިފައިވަނީ، އަންނަ ޖެނުއަރީމަހުގެ 27 ވަނަ ދުވަހުއެވެ.

ސްކޫލް ބޮޑުޗުއްޓީ ޑިސެމްބަރަށް ބަދަލުކޮށްފައި މިވަނީ ހަތަރު އަހަރުގެ މުއްދަތަކަށްފަހުއެވެ. 

ސްކޫލްތަކުގެ ބޮޑު ޗުއްޓީ ޑިސެމްބަރަށް ބަދަލުކުރުމަކީ ރައީސް ޑރ.މުއިއްޒު ސަރުކާރުގެ ވައުދެކެވެ. ރައީސް އެގޮތަށް ނިންމެވީ ގިނަ ބެލެނިވެރިން އެގޮތަށް އެދެމުން އަންނާތީކަމަށް ސަރުކާރުން ވަނީ ކުރިން ބުނެފައެވެ. އެންމެކުރިން ސްކޫލް ބޮޑުޗުއްޓީގެ ގޮތުގައި ހަމަޖައްސާފައި އޮންނަނީ ޑިސެމްބަރުމަހެވެ. ނަމަވެސް 2021 ވަނަ އަހަރު ބޮޑުޗުއްޓީ އަހަރު މެދުތެރެއަށް ބަދަލުކުރުމަށް ނިންމިއިރު، އެކަން އެގޮތަށް ބަދަލުކުރީ ޓޫރިޒަމްގެ ހައި ސީޒަންކަމަށް ވުމުން ރިސޯޓްތަކުން މުއައްޒަފުންނަށް ޗުއްތީ ދިނުމުގައި ހިފެހެއްޓުންތަކެއް ގެންގުޅޭތީއެވެ.

ޖެނުއަރީމަހުގެ 27 ވަނަ ދުވަހު ކިޔެވުން ފެށޭއިރު،  ފުރަތަމަ ޓާމަށް ސްކޫލްތައް ބަންދުވާނީ މެއިމަހުގެ 24 ހުން 30 ހަށެވެ.

އައު ކަލަންޑަރުގައި މިފަހަރު ދަރިވަރުން އެއް ސުކޫލުން އަނެއް ސްކޫލަށް ބަދަލުކުރުމަށް ވަކި ދުވަސްތަކެއް ވަނީ ހަމަޖައްސާފައެވެ. ޓްރާންސްފާރ ދުވަސްތަކުގެ ގޮތުގައި ހަމަޖައްސާފައިވަނީ މެއި 17 އިން ފެށިގެން ޖޫން 15 ގެ ނިޔަލަށެވެ. ޓީޗަރުންގެ ޕީޑީ ޑޭ ދުވަހުގެ ގޮތުގައި މާރޗްމަހުގެ 1 ވަނަ ދުވަހުން ފެށިގެން 8 ވަނަ ދުވަސް ހަމަޖައްސާފައިވާއިރު، މިއީ މިގޮތަށް ވަކިން ދުވަސް ކަނޑައެޅުނު ފުރަތަމަ ފަހަރެވެ. 

އަންނަ އަހަރުވެސް ދަރިވަރުން ރޯދަމަހު ސްކޫލަށް ކިޔަވަންދާނީ އެއް ހަފްތާއަށެވެ. ނަމަވެސް ޓީޗަރުން މާޗްމަހުގެ ފުރަތަމަ ހަފްތާ ހޭދަކުރާނީ ޕްރޮފެޝަނަލް ޑިވެލޮޕްމަންޓް ދުވަހުގެ ގޮތުގައި ސްކޫލުގައެވެ