ޗައިނާ ސަރުކާރުން ރާއްޖެއަށް 85 މިލިއަން ޑޮލަރު، ގާތްގަނޑަކަށް 1.3 ބިލިއަން ރުފިޔާގެ އެހީ ދިނުމަށް ނިންމައިފިއެވެ.

ޗައިނާއިން ރާއްޖެއަށް ދިނުމަށް ނިންމި މި އެހީއަކީ އެޤައުމުގެ އެހީގައި ރާއްޖޭގައި ކުރިއަށްގެންދާ ތިން މަޝްރޫޢުއަކަށް ދިނުމަށް ނިންމި ހިލޭ އެހީއެވެ.

މިކަމަށްޓަކައި ފޮރިން މިނިސްޓްރީގައި ބޭއްވި ރަސްމިއްޔާތުގައި ދިވެހިރާއްޖޭގެ ފަރާތުން ސޮއިކުރެއްވީ، ޚާރިޖީ ވަޒީރު ޑރ. އަބްދުﷲ ޚަލީލެވެ. އަދި ޗައިނާ ސަރުކާގެ ފަރާތުން ސޮއިކުރެއްވީ، ރާއްޖޭގައި ހުންނަވާ އެޤައުމުގެ ސަފީރު ކޮންގް ޒިންހުއާ އެވެ.

ޗައިނާއިން އެހީތެރިކަން ދިން ތިން މަޝްރޫޢުގެ ތެރޭގައި ހިމެނެނީ ކައުންސިލް އިދާރާތައް އެޅުމަށް ދިން އެހީއާއި، ޗައިނާ-މޯލްޑިވްސް ފްރެންޑްސިޕް ހޮސްޕިޓަލް މަޝްރޫޢުގެ އިތުރުން މާލެ އަދި ވިލިމާލޭގެ މަގުތައް ތަރައްޤީކުރުމުގެ މަޝްރޫޢުއެވެ. 

އެއްބަސްވުމުގައި ސޮއިކުރުމަށް ބޭއްވި މި ރަސްމިއްޔާތުގައި ވާހަކަދައްކަވަމުން ހާރިޖީ ވަޒީރު ޢަބްދުﷲ ހަލީލް ވަނީ މިދިޔަ އަހަރުތަކުގައި ދެ ޤައުމުގެ ގުޅުން ވަރަށްބޮޑަށް ބަދަހިވެފައިވާކަން ފާހަގަކުރައްވައި، ޗައިނާއަކީ ރާއްޖޭގެ ތަރައްޤީގެ މުހިންމު ބައިވެރިއެއްކަން ފާހަގަކުރައްވާފައެވެ.

ޗައިނާ ސަފީރު ވިދާޅުވީ މިއީ ރާއްޖެއާ ޗައިނާގެ ވެރިންގެ މެދުގައި ކުރުމަށް ނިންމި ކަންކަން ތަންފީޒު ކުރުމަށް ވެވިގެންދިޔަ މުހިންމު އެއްބަސްވުމެއްކަމަށެވެ.