ކަނޑުމަގުން ރާއްޖެ އެތެރެކުރަން އުޅުނު 40 ކިލޯގެ މަސްތުވާތަކެތި އަތުލައިގަނެފިއެވެ.
ކަސްޓަމްސްއިން އަތުލައިގަނެފައިވަނީ މަސްތުވާތަކެތީގެ ބާވަތެއްކަމަށްވާ ހަޝިޝް އޮއިލްއެވެ. މި ތަކެތީގެ މަގުމަތީގެ އަގު 32 މިލިއަން ރުފިޔާއަށްވުރެ މަތިވާނޭކަމަށް ބެލެވެއެވެ.
އަތުލައިގަތް މަސްތުވާތަކެތި، ކަމާބެހޭ އޮފިސަރުން ޓެސްޓްކުރުމުގެ ތެރެއިން... ފޮޓޯ: މޯލްޑިވްސް ކަސްޓަމްސް
މޯލްޑިވްސް ކަސްޓަމްސް ސާވިސްއިން ބުނީ މިތަކެތި ފެނިފައިވަނީ ބަލާފާސްކުރުމުގެ ތެރެއިން ކަމަށެވެ. މި ތަކެތި އެތެރެކުރަން މަސައްކަތްކޮސްފައިވަނީ، ޗޮކްލެޓް ސިރަޕް ފުޅިތަކަކަށް އަޅައިގެންނެވެ.
އަތުލައިގަތް ތަކެތި ޓެސްޓްކުރުމުގެ މަރުހަލާގެ ތެރެއިން.. ފޮޓޯ: ކަސްޓަމްސް
ރާއްޖެ އެތެރެކުރަން އުޅުނު ގިނަ އަދަދެއްގެ މަސްތުވާތަކެތި ކަސްޓަމްސްއިން އަތުލައިގަނެފައިވާއިރު، ސަރުކާރުގެ ކަމާބެހޭ މުއައްސަސާތަކުން ދަނީ މަސްތުވާތަކެއްޗާ ދެކޮޅަށް ވަރަށް ފުޅާދާއިރާއެއްގައި އޮޕަރޭޝަނެއް ހިންގަމުންނެވެ.
އޮޕަރޭޝަން އަލިމަގު ނަމުގައި ޑްރަގާ ދެކޮޅަށް ބޮޑު އޮޕަރޭޝަނެއް ފަށާފައިވަނީ ނޮވެމްބަރުމަހުގެ 13 ވަނަ ދުވަހުއެވެ. ދިވެހިރާއްޖެއަކީ ޑްރަގްގެ ވަބާއިން އެއްކޮށް ސަލާމަތްވެފައިވާ ޤައުމަކަށް ހެދުމަށް ސަރުކާރުން ގިނަ މަސައްކަތްތަކެއް ކުރަމުންދާކަމަށް އެދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
