ނުވަ ފަހަރު އިއުލާނުކޮށްގެން ވެސް ނުހޯދުނު އިޒާމް އަމިއްލައަށް ފުލުހަށް ހާޒިރުވެއްޖެ
ކޯޓުން އަންގައިގެން ނުވަ ފަހަރު މަތީން އިއުލާނުކޮށްގެން ވެސް ގދ. ވާދޫ / ސަބާހާމަންޒިލް، އިޒާމް ޒާހިރު ހޯދިފައިނުވާ ކަމަށް ފުލުހުން ރޭ ހާމަކޮށްފައި ވަނިކޮށް އޭނާ އަމިއްލައަށް ފުލުހުންގެ އިދާރާއަށް ހިނގައްޖެ އެވެ.
އިޒާމްގެ މައްޗަށް ކޯޓްގައި ދަނީ ބޮޑު ޝަރީއަތެއް ހިނގަމުންނެވެ. ހުކުމް ކުރަން އޭނާ ހޯދާތާ އަހަރު ދުވަސްވަނީ އެވެ.
އޭނާ ހޯދުމާއި ގުޅޭގޮތުން ސުވާލުކުރުމުން ފުލުހުން ރޭ ބުނީ އިޒާމް، ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް އެކި ފަހަރު މަތިން ކޯޓުން ފުލުހުންގެ މައްޗަށް އަމުރުކޮށްފައިވާ ކަމަަށެވެ. އަދި މީހާ ކޯޓަށް ހާޒިރުކުރުމަށް ހޯދުމަށްޓަކައި ނުވަ ފަހަރެއްގެ މަތިން ފުލުހުން ވާނީ އިއުލާންކޮށްފައި ކަމަަށެވެ.
ނަމަވެސް މިހާތަނަށް ކުރެވުނު މަސައްކަތުން އެ މީހާ ފެނިފައިނުވާ ކަމަށް ވަނީ ބުނެފަ އެވެ.
ފުލުހުން ދެންމެ ބުނީ އިޒާމް ޒާހިރު މިއަދު އަމިއްލައަށް ފުލުހުންގެ ކަސްޓޯޑިއަލްއަށް ހާޒިރުވުމުން ވަނީ ހައްޔަރުކޮށްފައި ކަމަށެވެ.
އިޒާމް ހައްޔަރުކޮށްފައިވަނީ ބަންދުގައި ބަހައްޓައިގެން ޑިސެންބަރު 30 ވަނަ ދުވަހު ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރު ތަންފީޒުކުރުމަށް ކަމަށް ވެސް ބުންޏެވެ.
Advertisement
This content is created and paid for by advertisers and does not involve Voice Journalists
