ވެލާނާ އިންޓަރނޭޝަނަލް އެއާޕޯޓުން މއިަދު 27،000 އަށްވުރެ ގިނަ ދަތުރުވެރިންނަށް ހިދުމަތް ދޭނޭކަމަށް އެ އެއާޕޯޓް ހިންގާ އެމްއޭސީއެލުން ބުނެފިއެވެ.

ކޮންމެ ހަފްތާއެއްގެވެސް އާދިއްތަ ދުވަހަކީ ވީއައިއޭއަށް ބާރުބޮޑުވާ ދުވަހެކެވެ. އަދި ހައި ސީޒަނުގައި އިތުރަށް ބާރުބޮޑު ވެގެންދާކަން ފާހަގަކޮށްލެވެއެވެ. އެމްއޭސީއެލުން ބުނީ 27،000 ހާހަށްވުރެ ގިނަ ފަސެންޖަރުންނަށް މިއަދު ހިދުމަތްދޭއިރު މިއީ މި އަހަރުގެ ތެރޭގައި އެންމެ ގިނަ ފަސިންޖަރުންނަށް އެއް ދުވަހެއްގައި ހިދުމަތް ދޭނެ ދެވަނަ ދުވަހެވެ.

ވީއައިއޭގެ އައު ޓާމިނަލުގައި ދަތުރުވެރިން މަޑުކޮށްލައިގެން.. ފޮޓޯ: އެމްއޭސީއެލް

ވީއައިއޭގެ އިންޓަނޭޝަނަލް ޓާމިނަލުން މިއަދު 22,142 ފަސިންޖަރުންނަށް ހިދުމަތް ދިނުމަށް މިއަދު ވަނީ ތާވަލްކޮށްފައެވެ. އޭގެ ތެރޭގައި ހިމެނެނީ ރާއްޖެއިން ފުރާ 11,035 ފަސިންޖަރުންނާއި ރާއްޖެ އަންނަ 11,107 ފަސިންޖަރުންނެވެ.

ވީއައިއޭގެ އައު ޓާމިނަލުގައި ދަތުރުވެރިން މަޑުކޮށްލައިގެން.. ފޮޓޯ: އެމްއޭސީއެލް

މިއަދު ޑޮމެސްޓިކް ޓާމިނަލުން ޖުމުލަ 4,843 ފަސިންޖަރުންނަށް ހިދުމަތް ދޭނެއެވެ. އެއީ މާލެއިން ފުރާ 2,652 ފަސިންޖަރުންނާއި މާލެ އަންނަ 2,191 ފަސިންޖަރުންނެވެ. މިއާއެކު މީގެ އިތުރުން މިއަދު 239 އެއާ ޓްރެފިކް މޫވްމަންޓްސް ރެކޯޑް ކުރެވޭނޭކަމަށް އެމްއޭސީއެލުން ބުންޏެވެ. 

މިކަމާ ގުޅޭގޮތުން އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދު ވިދާޅުވީ، މިއަދަކީ އެއާޕޯޓުގެ ތާރީހުގައިވެސް އެންމެ ބާރު ބޮޑު އެއް ދުވަސް ކަމަށާއި، ކިއުތަކުގައި ފަސިންޖަރުން ތިބެންޖެހޭ ވަގުތު އިތުރުވުން ކުޑަކޮށް, ހިދުމަތް އަވަސް ކުރުމަށްވެސް ޕްލޭންތައް ރާވައިގެން ކުރިއަށް ގެންދާނެ ކަމަށެވެ. އެއާޕޯޓަށް ބާރު ބޮޑުވި ނަމަވެސް ފަސިންޖަރުންނަށް އާ ޓާމިނަލުން ލިބޭ ތަޖުރިބާ ރަނގަޅުވުމަކީ ލިބޭ އުފަލެއްކަމަށް އޭނާ ވިިދާޅުވިއެވެ.