މި ވެރިކަމުގައި ބޯހިޔާވަހިކަން އެޅުމަށްޓަކައި ބޭންދުނު އެންމެ ގާބުރިއެއްވެސް އަދި ނެތް: މަޢުރޫފް
މި ވެރިކަމަކަށް ދެ އަހަރު ވެގެންދިޔައިރު ބޯހިޔާވަހިކަމުގެ މައްސަލަ ހައްލުކުރުމަށް، އެންމެ މަޝްރޫޢުއެއްވެސް ފެށިފައި ނުވާކަމަށް ބުނެ އިދިކޮޅު އެމްޑީޕީން ސަރުކާރަށް ވަރަށް ބޮޑަށް ފާޑުކިޔައިފިއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކެންދޫ ދާއިރާގެ މެންބަރު މަޢުރޫފް ޒާކިރު ވަނީ ސަރުކާރުގެ ސިޔާސަތު ތަކަށް ވަރަށް ބޮޑަށް ފާޑުވިދާޅުވެފައެވެ.
އެގޮތުން ވިދާޅުވީ، މި ސަރުކާރުން ވެރިކަމަށް އައީ ވަރަށް ބޮޑެތި ވަޢުދުތަކެއް ވެގެން ކަމަށެވެ. އެހެން ނަމަވެސް ދެ އަހަރުވެގެން ދިޔައިރު އިންތިޚާބުގެ ތެރެއިން ވީ ވަޢުދުތައް ފުއްދިފައި ނުވާ ކަމަށާ، ރައްޔިތުން ނިކަމެތިވެ ގައުމުގެ އިޤްތިޞާދީ ޙާލަތު ވަރަށް ބޮޑަށް ދަށްވެފައިވާ ކަމަށް އޭނާ ވިދާޅުވިއެވެ.
މިއާއެކު މަޢޫރޫފް ވިދާޅުވީ، 2025 ވަނައަހަރަށް ރައީސް ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނުގައި، މި އަހަރަކީ ތަރައްގީގެ މަޝްރޫޢުތައް ބާރު ސްޕީޑްގައި ކުރިއަށްދާނެ އަހަރެއް ކަމަށާ، މިއީ ބޯހިޔާވަހިކަމުގެ އަހަރަކަށް ވާނެ ކަމަށް ވިދާޅުކަމަށެވެ. އެހެން ނަމަވެސް، އެކަންވެސް ނުވާ ކަމަށް އޭނާ ވިދާޅުވިއެވެ.
ބޯހިޔާވަހިކަމަށް ޚާއްސަ އަހަރެއްގައި، ޚާއްސަ ބަޖެޓެއްގައި ދިވެހިރައްޔިތުންނަށް ލިބުނީ ކޮން ބޯހިޔާވަހިކަމެއް؟ އެކި ތާރީޚް ދެއްވަމުން ވިދާޅުވަމުން އެ ކުރިއަށް ގެންދަވަނީ. އެއްވެސް ރައްޔިތަކަށް ލިބުނު ބޯހިޔާވަހިކަމެއް ނެތް. އަދި ބޯހިޔާވަހިކަމެއް އެޅުމަށްޓަކައި ރާއްޖޭގައި މިހާތަނަށް، ރައީސް މުޢިއްޒުގެ ވެރިކަމުގައި ބޭންދުނު އެންމެ ގާބުރިއެއްވެސް ނެތް
މަޢުރޫފް ޒާކިރު
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުން: ފޮޓޯ/ އެމްޑީޕި
މި ސަރުކާރުން ބޯހިޔާވަހިކަމުގެ މައްސަލަ ހައްލުކުރުމަށް މަޝްރޫޢު ނުހިންގާ ކަމަށް އިދިކޮޅުން ބުނަމުންދާއިރު، އެކަމާ ގުޅިގެން ނޫސްވެރިއަކު ކުރި ސުވާލަށް ޖަވާބު ދެއްވަމުން އިއްޔެ ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރ ޑރ. އަބްދުالله މުއްޠަލިބު ވަނީ މާލެ ސަރަހައްދުގައި ކުރީ ސަރުކާރުން އަޅަންފެށި 4000 ފުލެޓް މްޝްރޫޢުގެ 68 އިންސައްތަ ނިންމީ މި ސަރުކާރުން ކަމަށް ވިދާޅުވެފައެވެ.
މި ސަރުކާރާ ހަވާލުވިފަހުން ބޯހިޔާވަހިކަމުގެ 3 މަޝްރޫޢުއެއް ނިންމާފައިވާ ކަމަށާ، އިތުރު 13 މަޝްރޫޢެއް އަތޮޅުތެރޭގައި ކުރިއަށްދާ ކަމަށް ވަޒީރު ވިދާޅުވިއެެވެ. އަދި މި އަހަރު 25 ބޯހިޔާވަހިކަމުގެ މަޝްރޫޢުއެއްގައި ސޮއި ކުރެވުނު ކަމަށާ، އޭގެ ތެރެއިން ބައެއް މަޝްރޫޢުތައް މިހާރު ފެށިފައުވާއިރު، އަނެއްބައި މަޝްރޫޢުތަކުގެ އަމަލީ މަސައްކަތް ފެށުމަށް ތައްޔާރުވަމުންދާ ކަމަށް ވަޒީރު ވިދާޅުވިއެވެ.
”ގާތްގަނޑަކަށް 800 ޔުނިޓް އެކި ރަށްރަށުގައި އެޅުމަށް ކޮންޓްރެކްޓާ ފައިނޭންސް އުސޫލުންވެސް ވަނީ ހަވާލުކިރެވިފައި. އިރާދަކުރެއްވިއްޔާ އަންނަ އަހަރު ކުރީކޮޅު އެ މަސައްކަތް ފެށިގެންދާނެ. އެއްވެސް ޒަމާނެއްގައި ރާއްޖޭގެ ރަށްތަކުގައި ފުލެޓް އިމާރާތް ނުކުރާ މިންވަރަށް މި ސަރުކާރުން އިމާރާތްކުރުމުގެ މަސައްކަތް ކުރިއަށް އެބަ ގެންދޭ“ މުއްޠަލިބު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
