އަތޮޅު ކައުންސިލްތަކުން ހިންގަމުން އަންނަ އަތޮޅު ފިހާރަތައް ހިންގާނެ ވަކި މޮޑެލް އެއް ތައްޔާރުކުރުމަށް ރޭވިފައިވާތީ، އެ މޮޑެލް ތައްޔާރުކޮށް ޢާއްމުކުރަންދެން އަތޮޅު ކައުންސިލްތަކުން ހިންގަމުންގެންދާ އަތޮޅު ފިހާރަތައް މިހާރުވެސް ހިންގަމުންގެންދާ ގޮތަށް ހިންގޭނެ ކަމަށް އެލްޖީއޭއިން ބުނެފިއެވެ. 

އެލްޖީއޭއިން މިހެން ބުނެފައިވަނީ، ފ އަތޮޅު ކައުންސިލުން ހިންގަމުން އަންނަ އަތޮޅު ފިހާރަ އުވާލުމާގުޅޭގޮތުން އެ ކައުންސިލުން އެލްޖީއޭއަށް ފޮނުއްވި ސިޓީގެ ޖަވާބުގައި ފޮނުވި ސިޓީގައެވެ. 

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނެވުނު 17 ވަނަ އިޞްލާޙާއެކު، އަތޮޅު ކައުންސިލްތަކުގެ މިހާރު ހިނގަމުންދާ ދައުރު ހަމަވުމާއެކު އުވާލުމަށް ހަމަޖެހިފައިވާތީ، ފ އަތޮޅު ސްޓޯރު 2025 ޑިސެންބަރު 31 ވަނަ ދުވަހުގެ ނިޔަލަށް ހުއްޓާލުމަށް ކައުންސިލުން ނިންމާފައިވާތީ މި ނިންމުން ތަންފީޛުކުރުމަށާއި، އަދި ފ އަތޮޅު ސްޓޯރުގައި މަސައްކަތްކުރާ މުވައްޒަފުންނާމެދު ޢަމަލުކުރާނެ ގޮތުގެ ލަފައަކަށް އެ ކައުންސިލުން ވަނީ އެދިފައެވެ. 

އެގޮތުން އެލްޖީއޭއިން ބުނީ، އެ އަތޮޅު ކައުންސިލުން ފ އަތޮޅު ސްޓޯރު ހުއްޓާލުމަށް ނިންމާފައިވީކަމުގައި ވީނަމަވެސް ހިނގަމުންމިދާ އަތޮޅު ކައުންސިލްތަކުގެ ދައުރު ހަމަވަންދެން ފ އަތޮޅު ސްޓޯރުގެ ވިޔަފާރި ހުއްޓާނުލާ ކުރިއަށް ގެންދިއުމަށާ، ފިހާރައަށް ލިބޭ ޢާމްދަނީން ފ އަތޮޅު ސްޓޯރުގެ މުވައްޒަފުންނަށް މުސާރަ ހަމަޖެއްސައިގެން ކުރިއަށް ގެންދިއުމަށް އެ އޮތޯރިޓީގެ ނިންމާފައިވާ ކަމަށެވެ.

އެހެންކަމުން، ފ އަތޮޅު ސްޓޯރުގައި މަސައްކަތްކުރާ އެއްވެސް މުވައްޒަފަކު ވަޒީފާއިން ވަކިނުކޮށް ފ އަތޮޅު ސްޓޯރުގެ ވިޔަފާރި ހިންގުމަށް އެލްޖީއޭއިން ވަނީ އެދިފައެވެ.