96 މަސާޖު ޕާލާ ބަންދުކޮށްފި؛ ރައީސް އެދިލެއްވީ ފާޙިޝް ކަންކަން މަނާކުރާ ބަޔަކަށް ވުމަށް
ހުއްދަ ނަގާފައިވާ ވިޔަފާރީގެ ބަދަލުގައި ފާޙިޝް ޢަމަލުތައް އެ ވިޔަފާރީގެ ނަން ބޭނުން ކޮށްގެން ހިންގަމުންދާ މަސާޖު ޕާލާތައް ބަންދު ކުރުމަށް 9 ޑިސެންބަރުގައި ފެށި އޮޕަރޭޝަން ގެ ދަށުން މިއަދާ ހަމަޔަށް 96 މަސާޖު ޕާލާ ވަނީ ބަންދުކުރެވިފައިވާ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެެވެ.
ރައީސް މުޢިއްޒު މިކަން އިއުލާން ކުރެއްވީ މިއަދު އެކްސްގައި ކުރެއްވި ޕޯސްޓެއްގައެވެ.
އެގޮތުން ރައީސް ވިދާޅުވީ، މިފަދަ ތަންތަން ހިނގެނީ މިފަދަ ތަންތަނުގެ ބޭނުން ހިފާ ފަރާތްތައް ތިބޭތީ ކަމަށާ އެއީ ހިތާމަޔާ އެކީ ޤަބޫލުކުރަންޖެހޭ ޙަޤީޤަތެއް ކަމަށެވެ.
މުޖުތަމަޢުން ފާޙިޝް ކަންތައްތަކާއި މުންކަރާތްތައް މަދުކުރެވޭނީ، މުޖުމަތަޢުގެ ޙާލަތު ބަދަލު ކުރެވޭނީ، ޢާއްމު ރައްޔިތުންނާއި އެންމެހާ ފަރާތްތަކެއްގެ ނިޔަތާއި ޢަމަލު އެފަދަ ކަންކަމުގައި އެއްގޮތްވެގެން، އެންމެންގެ ޚިޔާލު އެފަދަ ކަންކަމުގައި އެއްގޮތްވެގެން ކަމަށް އެމަނިކުފާނު ވިދާޅުވިއެެވެ.
އަޅުގަނޑުމެންނަކީ ފާޙިޝް ކަންކަމާއި އެންމެހާ މުންކަރާތްތަކަށް ނޫނެކޭ ބުނާ ބަޔަކަށް ވަމާތޯ!
ރައީސް މުޢިއްޒު
ދާދިފަހުން ބޭއްވި ނޫސްވެރިންގެ ބައްދަލުވުމުގައި ދަޚިލީ ވަޒީރު އިހްސާން ވަނީ، މަސާޖް ޕާލާގެ ގޮތުގައި ފާހަގަކުރެވިފައިވާ ތަންތަން ބަލާފާސްކުރުމުގެ އުސޫލު މިހާރު ބަދަލުކޮށްފައިވާކަމަށް ވިދާޅުވެފައެވެ.
މިނިސްޓަރު ވިދާޅުވީ، މީގެ ކުރިން މަސާޖު ޕާލާ ތަކުގައި ހަށިވިއްކުމުގެ އަމަލުތައް ހިންގާކަން ފާހަގަވެއްޖެނަމަ މިހާތަނަށް އަމަލުކުރަމުން އައިގޮތަކީ އެތަންތަނުގައި މަސައްކަތްކުރާ މީހުން ކަމާބެހޭ ފަރާތްތަކުގެ ބެލުމުގެ ދަށަށް ގެންގޮސްގެން މައްސަލަ ބެލުން ކަމަށެވެ. ނަމަވެސް ދެން ހަށިވިއްކާ ތަނެއްކަން އެނގިއްޖެނަމަ، އެތަނެއް ހިންގަމުންއައި ހުއްދަ ހިފަހައްޓާނޭކަން މިނިސްޓަރު ވިދާޅުވިއެވެ. އަދި މާލޭގައި ސްޕާގެ ވިޔަފާރި ހިންގުމުގެ ހުއްދަ ދީފައި ނުވާނޭކަމަށްވެސް މިނިސްޓަރުގެ ވާހަކަފުޅުގައި ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
