ތެލެސީމިއާ މީހުންނަށް އަންނަ އަަހަރުން ފެށިގެން އެލަވަންސް ދެއްވަން ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާފައިވާ އިއުލާނާ އެއްގޮތަށް ޖަނަވަރީ މަހުން ފެށިގެން އެލަވަންސް ދޭން ނިންމައިފި އެވެ.

ހައްދުންމަތީ ގަމުގައި ބޭއްވި ޖަލްސާގައި ރައީސް ވަނީ ތެލެސީމިއާ މީހުންނަށް އެލަވަންސް ދެއްވުމަށް އެމަނިކުފާނު ވެވަޑައިގެންފައިވާ ވައުދުފުޅާއި ގުޅޭގޮތުން ވާހަކަފުޅު ދައްކަވާފަ އެވެ. ވިދާޅުވީ އަންނަ އަހަރު އެ އެލަވަންސް ދެއްވަން ފައްޓަވާނެ ކަމަށެވެ.

އެގޮތުން އަންނަ އަހަރުގެ ބަޖެޓްގައި އެކަމަށް 11.7 މިލިއަން ރުފިޔާ ހިމަނުއްވާނެ ކަމަށް ވިދާޅުވި އެވެ. އެއީ ކޮންމެ ކުއްޖަކަށް / މީހަކަށް މަހަކު 1,000 ރުފިޔާ އެެވެ. ތަފާސް ހިސާބުތައް ދައްކާގޮތުން މިވަގުތު ތެލެސީމިއާ އާބާދީއަކީ 982 އެކެވެ.

ނަމަވެސް މިއަދު އިއުލާނު ކުރީ ކޮންމެ މީހަކަށް މަހަކު 2,000 ރުފިޔާގެ އިނާތެއް ދިނުމަށެވެ. 

ރައީސް ވިދާޅުވީ މިހާރު ލިބޭ ފަރުވާއާއެކު މި އެލަވަންސް ތައާރަފުކުރުމުން ތެލެސީމިއާ އާއިލާތަކަށް އިތުރު ލުޔެއް ލިބިގެންދާނެ ކަމަށް އުންމީދު ކުރައްވާ ކަމަށެވެ.