2017 ވަނަ އަހަރުގައި މަރާލި މަޝްހޫރު ބްލޮގާ ޔާމީން ރަޝީދުގެ މައްސަލައި ގައި ދައުވާ އުފުލި ހ. އަންނާރުމާގެ އިސްމާޢީލް ހައިޝަމް ރަޝީދުއާއި ހުޅުމާލެ ގޯތި ނަންބަރު 11399 އަޙްމަދު ޒިހާން އިސްމާޢިލް އަލުން ބަންދުކުރުމަށް ކްރިމިނަލް ކޯޓުން އަމުރުކޮށްފި އެވެ.
އެޕްރީލް 23, 2017 ދުވަހުގެ ވަގުތެއްގައި ސ.ފޭދޫ، ޗަބޭލީގެ ޔާމީން ރަޝީދުގެ ދިރިއުޅޭ ގެއަށް ޔާމީން ރަޝީދު ވަނުމުން ޔާމީން ރަޝީދު ހިފަހައްޓާ ތޫނު ހަތިޔާރުން ޙަމަލާދީ ރަޙުމް ކުޑަގޮތަކަށް މަރާލާފައިވާ މައްސަލައިގައި ހައިކޯޓުގައި ކުރިއަށްދިޔަ އިސްތިއުނާފީ މައްސަލަ އެކޯޓުން ބެއްލެވުމަށް ފަހު، ހައިޝަމް އާއި ޒިހާންގެ މައްޗަށް ސާބިތުވި ދައުވާތައް ބާތިލްކޮށް މި މައްސަލަ ކްރިމިނަލް ކޯޓަށް ވަނީ އަންގާފައިވެ އެވެ.
ކްރިމިނަލް ކޯޓުން ނިންމާފައި އޮތީ އެ މައްސަލާގައި ހައިޝަމް އާއި ޒިހާންގެ މައްޗަށް ކުށް ސާބިތުވާ ކަމަށެވެ. ނަމަވެސް ހައިކޯޓުން ވަނީ އެ ނިންމުން ބާތިލުކޮށް މުޅި މައްސަލަ އަލުން ބަލަން އަމުރުކޮށްފަ އެވެ. އަދި އެ މީހުން ދޫކޮށްލި އެވެ. ހައިކޯޓުގައި ދައުލަތުން ވަނީ އެ ދެ މީހުން ބަންދު ކުރުމަށް އެދިފަ އެވެ. ނަމަވެސް އެ އަމުރެއް އެ ކޯޓުން ނުދިނެވެ.
ޕީޖީ އޮފީހުން ބުނީ އެ މައްސަލައާ ގުޅިގެން ހައިޝަމް އާއި ޒިހާންގެ ބަންދާމެދު ގޮތެއް ކަނޑައަޅައިދިނުމަށް އެ އޮފީހުން ކްރިމިނަލް ކޯޓަށް ހުށަހަޅާފައިވާ ހުށަހެޅުމާ ގުޅިގެން، ކްރިމިނަލް ކޯޓަށް ތަހްވީލްކުރި މައްސަލައިގެ ޝަރީއަތް ނިމެންދެން އެ ދެ މީހުން ބަންދުކުރަން ނިންމާފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
