އެމްޓީސީސީއަށް މިއަހަރުގެ 3 ވަނަ ކުއާޓަރގައި 501.2 މިލިޔަން ރުފިޔާގެ އާމްދަނީއެއް ލިބިފައިވާކަމަށް އެކުންފުނީގެ މާލީ ރިޕޯޓުތަކުން ދައްކައިފިއެވެ.

މި ރިޕޯޓުތަކުގައި ވާގޮތުން އެކުންފުންޏަށް ޖުމްލަ ފައިދާގެ ގޮތުގައި 13.4 މިލިޔަން ރުފިޔާ ލިބިފައިވާއިރު، ކުންފުނި ހިންގައިގެން 29.3 މިލިޔަން ރުފިޔާގެ ފައިދާއެއް ލިބިފައިވެއެވެ. 

މިދިޔަ އަހަރުގެ ތިންވަނަ ކުއާޓަރުގައި އެމްޓީސީސީން ވަނީ 373 މަޝްރޫޢެއްގެ މަސައްކަތް ކުރިއަށް ގެންގޮސްފައެވެ. އަދި މި މުއްދަތުގެ ތެރޭގައި އެމްޓީސީސީން ވަނީ 44 މަޝްރޫޢެއްގެ އަމަލީ މަސައްކަތް ފަށާފައެވެ. މީގެ ތެރޭގައި ބިން ހިއްކުމާއި ގޮނޑުދޮށް ހިމާޔާތްކުރުމުގެ މަޝްރޫޢުތަކާއި، ބަނދަރު އަދި އެއަރޕޯޓްތައް ތަރައްޤީކުރުމުގެ މަޝްރޫޢުތައް ހިމެނެއެވެ. އަދި މަގު ހެދުމާއި އިމާރާތްކުރުމާއި ފުޓްބޯޅަ ދަނޑުތައް ހެދުމުގެ އިތުރުން ސާވޭ އަދި ކޮންސަލްޓެންސީގެ މަސައްކަތްތައްވެސް އެމްޓީސީސީން މިދިޔަ އަހަރުގެ ތިންވަނަ ކުއާޓަރުގައި ކުރިއަށްގެންގޮސްފައިވެއެވެ. 

މިދިޔަ އަހަރުގެ ތިންވަނަ ކުއާޓަރުގައި އެމްޓީސީސީން 44 މަޝްރޫއެއްގެ އަމަލީ މަސައްކަތް ފަށާފައިވާއިރު، އިތުރު 68 މަޝްރޫއެއް އެކުންފުންޏާ ވަނީ ހަވާލުކޮށްފައެވެ. އަދި މި މުއްދަތުގެ ތެރޭގައި އެކުންފުނިން ވަނީ 6 މަޝްރޫއެއްގެ އަމަލީ މަސައްކަތް ކާމިޔާބުކަމާއެކު ނިންމާލާފައެވެ.

މި ކުއާޓާގެ ތެރެގައި ހއ. އިހަވަންދޫގެ ބިން ހިއްކުމާއި ގޮނޑުދޮށް ހިމާޔާތްކުރުން މަސައްކަތާއި، ހއ. ހޯރަފުށީގެ ގޮނޑުދޮށް ހިމާޔާތްކުރުމުގެ މަސައްކަތާއި، މާލެ ސިޓީ ކައުންސިލް އައު އޮފީސް އިމާރާތުގެ އާކިޓެކްޗަރަލް އަދި ކޮންސަލްޓެންސީގެ މަސައްކަތާއި، ކ. ތިލަފުށީގެ ލޮޖިސްޓިކް ޓަރމިނަލުގެ ފޭސް 1ގެ މަސައްކަތާއި، ވ. ފެލިދޫގެ އައުޓްޑޯރ ޖިމްގެ މަސައްކަތް އަދި މ. ދިއްގަރުގެ ގޮނޑުދޮށް ހިމާޔާތްކުރުމުގެ މަސައްކަތްއެ ކުންފުނިން ވަނީ ނިންމާލާފައެވެ.