ނިއުޔޯކް ސިޓީގެ މޭޔަރުކަމުގެ މަގާމާ އަލަށް ހަވާލުވެވަޑައިގަތް ޒޯރާން މަމްދާނީ، އެ ސިޓީގެ ކުރީގެ މޭޔަރު އެރިކް އެޑަމްސް އިޒްރޭލަށް ތާއީދުކޮށް ނެރުނު ރިޔާސީ އަމުރުތަކެއް ބާތިލުކުރައްވައިފިއެވެ.

މޭޔަރު މަމްދާނީ މި ފިޔަވަޅު އަޅުއްވާފައިވަނީ އޭނާގެ ދައުރުގެ އެންމެ ފުރަތަމަ މަސައްކަތްތަކުގެ ތެރޭގައެވެ. މިގޮތުން ބާތިލުކުރައްވާފައިވަނީ 26 ސެޕްޓެމްބަރު 2024 ގެ ފަހުން ކުރީގެ މޭޔަރު އެޑަމްސް ސޮއިކޮށްފައިވާ އަމުރުތަކެވެ. އެއީ ކޮރަޕްޝަންގެ މައްސަލަތަކެއްގައި އެޑަމްސްގެ މައްޗަށް ދައުވާ އުފުލުނު ތާރީޚެވެ. މަމްދާނީ ވިދާޅުވި ގޮތުގައި އެ ދުވަހަކީ ގިނަ އަދަދެއްގެ ނިއުޔޯކް ރައްޔިތުން ސިޔާސީ ދާއިރާއަށް އޮތް އިތުބާރު ގެއްލިގެން ދިޔަ ދުވަހެކެވެ.

ބާތިލުކުރެވުނު އަމުރުތަކުގެ ތެރޭގައި، އިންޓަނޭޝަނަލް ހޮލޮކޯސްޓް ރިމެމްބަރެންސް އެލަޔަންސް (IHRA) އިން ކަނޑައަޅާފައިވާ އެންޓި-ސެމިޓިޒަމް ނުވަތަ ޔަހޫދީންނާ ދެކޮޅުވެރިވުން މާނަކުރުން ބަލައިގަތުމަށް ނެރުނު އަމުރާއި، އިޒްރޭލާ ދެކޮޅަށް ހިންގާ ބޮއިކޮޓް ހަރަކާތްތަކަށް ހުރަސްއަޅާ ގޮތަށް ސިޓީގެ އިދާރާތަކަށް ނެރެފައިވާ އަމުރު ހިމެނެއެވެ. 

މި ނިންމުމާ ގުޅިގެން އިޒްރޭލުގެ ފޮރިން މިނިސްޓްރީން ވަނީ އެކްސް މެދުވެރިކޮށް މަމްދާނީއަށް ވަރަށް ބޮޑަށް ފާޑުކިޔާފައެވެ. އެ މިނިސްޓްރީން ބުނެފައިވަނީ މިއީ މަމްދާނީގެ ހަގީގީ ސޫރަ ހާމަވެގެންދިޔަ ކަމެއް ކަމަށާއި، މިއީ ޔަހޫދީންނާ ދެކޮޅުވެރިކަން އިތުރުކުރުން ކަމަށެވެ.

ނަމަވެސް، ކައުންސިލް އޮން އެމެރިކަން-އިސްލާމިކް ރިލޭޝަންސް (CAIR) އިން ވަނީ މި ނިންމުމަށް މަރުހަބާ ކިޔައިފައެވެ.

މަމްދާނީއަކީ ފަލަސްތީނުގެ މިނިވަން ދައުލަތަކަށް ތާއީދުކުރައްވާ އަދި އިޒްރޭލު ސަރުކާރަށް ފާޑުވިދާޅުވާ ބޭފުޅެކެވެ. ނަމަވެސް، އޭނާގެ މައްޗަށް ކުރެވޭ އެންޓި-ސެމިޓިޒަމްގެ ތުހުމަތުތައް އޭނާ ދޮގުކުރައްވައެވެ.

ނިއުޔޯކް ސިޓީގެ މޭޔަރުކަމާ ހަވާލުވެވަޑައިގަތް ފުރަތަމަ މުސްލިމް މޭޔަރުގެ ގޮތުގައި ތާރީޚުން ޖާގަ ހޯއްދެވި މަމްދާނީ ވިދާޅުވީ، ޚިޔާލު ތަފާތުވި ނަމަވެސް އޭނާއަކީ ހުރިހާ ނިއުޔޯކް ރައްޔިތުންގެ މޭޔަރު ކަމަށާއި، ހުރިހާ ރައްޔިތުންގެ ހިމާޔަތުގައި މަސައްކަތް ކުރައްވާނެ ކަމަށެވެ.